Footer

National artist, sabali pay a Bigueno, nainominar para Gawad Manglilikha

VIGAN CITY – Dua a Bigueno ti innominar ti sangguniang panlungsod ditoy siudad a mapadayawan kas Gawad Manlilikha ng Bayan.

Kinuna ni Konsehal Juan Carlo Medina a nangaramid iti maysa a resolusion a manginominar kada Fidel Go ken Agapita Cachero kas Gawad Manlilikha ng Bayan nga ipapaay ti National Commission of the Culture and the Arts gapu iti ndakkel a naipaayda iti benneg ti panagaramidan iti burnay ken damili.

Maysa a gupit ni Go a daydayawen dagiti turista ti sidadaan latta a panangipabuyana no kasano ti panagaramid iti burnay kadagiti bumisita iti paktoriana a masarakan iti Barangay Pagburnayan ditoy siudad.

Maysa a kangrunaan a destinasion dagiti turista iti panagpallailangda iti Vigan City ti pagaramidan iti burnay ni Go, agsipud ta ditoy ti pakakitaanda kadagiti nadumaduma ti sukogna ken klase a burnay a magustuan dagiti pasdek-negosio ken prominente a tattao a pagdekorar iti salas wenno minuyonganda.
Maipalagip a napili ni Go a National Artist iti pottery idi 1990.
Innayon ni Medina a dakkel met ti naiambag ni Agapita Cachero iti benneg ti panagdamili.

Kinuna ti konsehal a no adda agpatulong ken ni Nana Agapita mainaig iti panagdamili, sidadaan latta met a mangibinglay iti talentona.

Dinakamat pay ni Medina nga idi naudi a historia oral, maysa ni Nana Agapita kadagiti nangisalaysay kadagiti nagdalananna iti panagdamilina kasta met dagiti sinursuruanna iti daytoy nga industria ti pagtaengan.

Nalatak metten ti Bulala, Ayusan, Paratong, Pong-ol, Salindeg, San Pedro a pakagatangan kadagiti damili kas iti paso, dalikan, lusob, ken dadduma a ramit iti balay a naaramid manipud iti nalabaga a pila a masarakan iti Barangay Ayusan ditoy siudad.

Kinuna ni Medina a napanunotna a mainominar babaen ti resolusion da Go ken ni Cachero tapno maikkan importansia dagiti nagapuananda iti panagaramid iti burnay ken panagdamili.

Segun ken ni Medina, no mapili da Go ken Cachero iti Gawad Manglilikha ng Bayan, umawatda kadagiti benepisio kas iti monthly allowance, hospitalization ken maikkanda iti pondo no adda aramidenda a proyekto. (Tawid News Team)