Footer

BANNER NEWS: P2-M naited kas suporta iti kampania ti Vigan a maibutos iti New7Wonders Cities of the World

BANNER NEWS: P2-M naited kas suporta iti kampania ti Vigan a maibutos iti New7Wonders Cities of the World

VIGAN CITY – Kas suportada iti kampania ti Vigan City a mabutosan a maysa kadagiti pito a baro a pagsidsiddaawan a siudad iti sangalubongan, saggaysa a million ti inted da First District Congressman Ronald Singson ken ni Governor Ryan Singson para iti text voting tapno masigurado a lumsot ti siudad iti daytoy maudi a rikos ti kompetision.

Mismo nga inyawat ni Gov. Singson ti P1 million kadagiti Vigan City officials nga indauluan ni Vice Mayor Lourdes Baquiran ken Konsehal Juan Carlo Medina tapno maaramat iti text voting para iti final round ti kampaniana para iti New7Wonders Cities of the World.

Kinuna ni Singson a no agkurang ti pondo, sidadaan ti gobierno probinsial a mangnayon pay tapno masigurado a mabutosan ti Vigan a maysa iti New7Wonders Cities of the World.

(Flash report: Maysa ti Vigan a nabutosan iti New7Wonders Cities of the World a pakairamanan ti Beirut, Lebanon; Doha, Qatar; Durban, South Africa; Havana, Cuba; Kuala Lumpur, Malaysia; ken La Paz, Bolivia. -Editor)

Iti immun-una nga interbio ti media ken ni Mayor Eva Marie S. Medina, kinunana a back to zero amin dagiti 14 a siudad a limsot iti panagbubutos idi Oktubre 7 ket on equal footing amin dagiti finalists isu nga inwayatda ti all-out campaign tapno lumsot ti Vigan a maysa kadagiti pito a baro a pagsidsiddaawan a siudad iti sangalubongan.

Inyussuat ti city government nga idadauluan ni Mayor Eva Marie S. Medina ti maysa a raffle promo babaen iti text itay nabiit kas paset iti nalawlawa a kampaniana iti maudi a rikus ti panagbubutos para iti New7WondersCities of the World a maiwaragawag inton Disiembre 7.

Pito a sag-P100,000.00 ti maited a gunggona kadagiti texter a mapagasatan a mabunot ti entry numberda.

Kabayatanna, agtultuloy ti panagsangpet dagiti suporta iti daytoy a kampania ti Vigan a mairaman a maysa kadagiti pito a baro a pagsidsiddaawan a siudad iti sangalubongan manipud kadagiti national agencies, nadumaduma a gunglo, prominente nga opisial ken nangato iti takemna iti turay, ken uray dagiti celebrities.

Itay Oktubre, inyussuat met ti gobierno probinsial iti pannakaituding ti maysa nga aldaw a panagpinsan amin nga empleado ti kapitolio a nangitext iti butosda iti Vigan iti New7WondersCities of the World.

“… Aramidentayo amin tapno mapapigsa pay ti kampania ti Siudad ti Vigan para iti New7Wonders Cities of the World,” kinuna ni Singson idinto a dinawatna ti agtultuloy a panagbutos dagiti kailianna babaen ti text tapno dakdakkel pay ti tiansa ti siudad a mangabak.

Kinuna ti gobernador nga iyussuatdanto pay ti final wave ti panagbutos ket saan laeng a doble no di pay triple ti panagbutosda tapno dakdakkel pay ti tiansa ti Vigan a mangabak.

“Masapul a double time ti panagbutostayo…” kinuna ni Singson idinto a dinawatna kadagiti amin a lokal a gobierno a pakaibilangan ti League of Governors of the Philippines iti itutulongda iti kampania ti Vigan City.

Kinuna ni Gov. Singson a no mangabak ti Vigan iti New7Wonders Cities of the World, dakkel ti pagdur-asan ti turismo ken ti ekonomia saan laeng iti Vigan no di pay ti probinsia ken iti sibubukel a pagilian.

Kinuna ti gobernador a text capital ti pagilian iti sangalubongan, isu a dakkel ti tiansa a mangabak ti Vigan City iti New7Wonders Cities of the World.

Iti sabali a bangir, nangted met ni Cong. Singson iti P1 million para iti cell cards a maaramat iti text voting iti final round ti kampania.

Kinuna met ni Cong. Singson a no mangabak ti Vigan a maysa iti New7Wonders Cities of the World, umadu dagiti negosiante nga umay mangipasdek iti negosioda iti probinsia.
Innayon pay ni Cong. Singson nga umadu dagiti turista a makatulong iti panagdur-as ti ekonomia ti pagilian.#

Comments are closed.