Footer

EDITORIAL: Saan a Kabaelan a Parukmaen dagiti Didigra ni Pinoy

No palausen ti manarita, natiltilen ni Pinoy kadagiti didigra a sinagrapna kadagiti napalabas a tawen kas iti bagyo, ginggined, layus, ken dadduma pay a kasla lunod ti nakaparsuaan nga imbulosna kadagiti umili.

Ita, maysa manen a bagyo, ni Bagyo Ruby (International Name: Hagupit), ti mangsansanut iti Kabisayaan. Sumagmamano nga aldaw sakbay a sumangpet, agkakaribuson dagiti agtuturay iti panagsaganada tapno mapabassit ti bilang dagiti agbalin a biktima iti daytoy a bagyo. Dakkel a leksion ti inted ni Bagyo Yolanda a nangsanot iti Central Visayas idi napan a tawen a nakaibuisan ti aganay 7,000 a biag ken nakadadaelan dagiti sanikua, kasta met dagiti ginasut a riwriw a pukaw iti inprastruktura, agrikultura ken ikanan.

Sakbay a dimteng ti Bagyo, ginasut a ribun dagiti umili ti napilitan a nagbakuit gapu iti mapattapatta a panaglayus iti lugarda iti panagdinakkel dagiti karayan ken baybay, malaksid laeng dagiti dakkel a bagi ti danum nga agdissuor manipud kadagiti kalbo a kabakiran ken bantay.

Ngem uray kasano a panagsagana, saan a malapdan nga adu latta dagiti agsagaba iti daytoy nga isasaplit ni Bagyo Ruby. Uray met ibaga ti gobierno nga adda umanay a saranay, iti dayta a kadakkel ti bilang dagiti biktima iti bagyo, saan nga umdas ti pondo nga isaganana. Adunto latta dagiti biktima iti bagyo ti narigat a danonen ti saranay gapu iti pannakaputed ti komunikasion ken kaadayo ti pangidaliasatan kadagiti kasapulanda nga arayat.

Kalpasan daydi Yolanda, sabali manen daytoy a panagrigat. Sabali manen a panagtuok. Sabali manen a pannubok a mangkarit iti kinatibker ken pigsa dagiti biktima.

Ngem mangnamnamakami a malasatan dagiti kailiantayo a biktima ti bagyo amin dagitoy a pannubok. Mamatikami a saan a rumukma ni Pinoy iti baet dagiti ingget dagsen a rigat, tuok ken kalbario a mangiluges kenkuana. Ikut ni Pinoy ti kinaandur ken ti kinatibker a tumakder manen iti nakaidalebanna tapno baliwanna a bangonen ti masakbayanna uray iti sanguanan dagiti agsasamusam a lunod ti nakaparsuaan a maipabaklay iti abagana.#

Comments are closed.