Footer

Lalaki, napaltogan iti uneg ti bus

MAGSINGAL, Ilocos Sur – Awan pay ti maibaga ti kapolisan ditoy iti kinasiasino ti armado a tao a nanggandat iti biag ti maysa a lalaki iti uneg ti maysa a bus idi aldaw ti Disiembre 4.

Ngem nabigbig ti biktima a maysa a Constante Ramos, Jr. y Cirilo, 46, naasawaan, ken residente iti Barangay Barbar, San Juan, Ilocos Sur.

Segun iti report manipud iti police station ditoy, napasamak ti pammaltog iti uneg ti Rexor Rodulf Transportation Bus bayat a nakasardeng ti lugan iti asideg ti welcome arch ti Barangay Bungro, Magsingal idi agarup 11:30 ti bigat ti Disiembre 4.

Kas maibatay iti report, agdaldaliasat ti lugan nga agpaamianan iti national highway ket simmardeng iti asideg ti arko ti Barangay Bungro, Magsingal ket innala dayta ti di nabigbig a pasahero a nangpaltog ken ni Ramos sa naglibas iti saan nga ammo a direksion.

Nagsagrap ti biktima kadagiti sugat iti makannigid a temporal ken makannigid a pungupunguanna ket naitaray iti Magsingal District Hospital sa naiyalis iti Mariano Marcos Memorial Hospital, Batac City para iti pannakaagasna.

Nangiwayat dagiti nagresponde a polis iti manhunt operation maikontra iti naglibas a suspek ngem negatibo ti resultana.

Nakarekobre dagiti inbestigador iti crime scene iti dua a kapsula ken dua a buli a mapapati a naiputok manipud iti cal. 38 revolver.

Nakasukain pay dagiti polis iti cal. 45 Armscor pistol nga addaan dua a magasin ken 16 a bala para iti dayta a kalibre iti bag ti biktima.

Iti pannakaisurat daytoy, di pay ammo no lisensiado ti nasao a paltog.#