Footer

Mannurot: Trabaho? Padasem ti Internet

Kolum ni Danny Antalan
(Maudi iti dua a paset)

Ania dagitoy a mabalin a pagsapulan iti internet:

1. Diaya a trabaho. Dagitoy a trabaho ti mabalinmo a serken kas maibasar iti paglaingam. Tunggal trabaho ket adda bukodna a tangdan wenno bayad. Masapulmo laeng ti ag-member kadakuada tapno maibilangka a pagpilian wenno sika ti mangpili kadakuada. Dagiti sites a kas koma ti Freelancer, Odesk, Fiverr, Jobstreet ket sumagmamano laeng kadagiti sites a mangididiaya ti trabaho. Dagitoy a trabaho ket paglainganam. No nalaingka iti photoshop ket sumrekka, ag-edit ti audio, agaramid ti desinio ken graphics, mangipatarus (translation), web design, transcription. Dagitoy ket sumagmamano laeng a mabalin a sumrekan tapno agtrabaho.

2. Trabaho iti panagsuratan. Narigat nga ibirok ti panagsuratan a trabaho. Ngem adu iti internet ti agur-uray kenka. Adu dagiti sites a mabalin a pangipablaakan iti sinuratmo a salaysay, sarita, daniw wenno kanta. Dagiti dadduma kadagitoy ti saan met agkasapulan ti kapadasan. Mabalin a padasen ti Personapaper, Bubblews, Tsu, dailytwocent, wattpad, writedge ken dadduma pay a writing platform a mabalinmo a pagpilian.

3. Nalaka a trabaho. Nalaka agsipud ta nalaka laeng ti aramidem. Saan a kasapulan ti master’s degree, wenno kurso, wenno talento wenno abilidad. Dagitoy a trabaho ket kaslaka la agmammama. Ania dagitoy a trabaho? Umuna, adda ti maaw-awagan a Pay Per Click (PPC)—masapulmo laeng ti sumrek kadagiti nagkaadu a sites ti PPC ket ti ubraen laeng, italmeg dagiti tunggal patalastas nga adda sadiay. Maikadua, ti maaw-awagan a survey—ti aramidem laeng ket sumrek iti siteda ket sungbatan ti survey nga ar-aramidenda wenno sika mismo ti mangaramid iti bukodmo a survey.

4. Mang-maintain iti bukod a site. Mangbukel ti bukod a blog wenno website ti maysa kadagiti ar-aramiden dagiti dadduma. Narigat laeng iti damona agsipud ta masapul a mangbukelka iti bukodmo a kredilidad tapno umadu ti mangbisita iti sitemo ken sumrek dagiti patalastas. Bayat ti panaglabas ti bulan ken tawen ket ditan a mariknamon ti pagimbagan. Anus ken gaget laeng met ti puonam ditoy.

5. Online marketing. Maysa kadagiti magamgamay itan dagiti Pinoy uray ni Ilokano. Ti wagas ket simple laeng—aglako ken aggatangka kadagiti banbanag babaen iti internet. Malaksid iti sulit.com ken ayosdito.com iti lokal a paggatangan ken paglakuan, adun ti mangar-aramat iti facebook, pinterest ken twitter accountda tapno agnegosio.

6. Video ken ladawan. Masapul nga adda accountmo para iti video ken picture. Youtube ti kasikatan a pagipaskilan ti video. Narigat ti agala iti views a maysa a pagibasaran iti ganansia iti youtube ngem no mairana nga agbalin a trending, kaslaka la nangabak met iti jueteng. Iti met laeng picture, mabalin ti mang-open iti account nga isu ti pagipaskilan kas koma iti wordpress wenno iti flickr.com. Mabalin met padasen ti makunkuna a stock photography wenno ilakom dagiti pictures.

Sumagmamano laeng dagitoy kadagiti potensial iti internet. Kinapudnona, nagad-adu ti ruangan a mabalinmo a sumrekan tapno agsapulka. Kas kinunak iti ngato, doliar ti kaadduanna a sueldoda kenka. Malaksid iti online marketing, kaadduanen ket doliar ti pagsuelduam.

Ngem adda latta met masapul a pagannurotan iti trabaho iti internet. Umuna, masapul nga adda talentom. Maikadua, masapul nga inadalmo met laeng ti idiayam a trabaho iti maysa a site. Maikatlo, masapul a nawerret ti panunotmo. Maikapat, nagagetka.

Kangrunaan ti amin, ammom ti agusar iti internet. No ania ti website, ti google, firefox, youtube, facebook ken dadduma pay. Ammuem no sadino ti mabalin a pangipatulodan iti sueldom. Ditoy Pilipinas, kaadduan kadagiti pangipadpadalananda iti bayad wenno sueldom ket babaen iti Paypal. Ti rigatna, masapulmo ti maaddaan iti credit card tapno maaddaanka iti Paypal nga isu ti pang-verifymo iti accountmo. Ngem no awan ti credit card, adda dagiti bangko a mabalin nga usaren ti debit card tapno maka-verify iti Paypal. Adda met dagiti kompania a mabalin a mangipatulod iti kuarta babaen iti Western Union ken dadduma pay a remittance center.

Ala, rugiantayo ngaruden ti ag-search iti internet iti trabahotayo.#