Footer

Sinursuran: Kasano Metten ti Pagtaengantayo?

Kolum ni Jobert M. Pacnis
(Maikadua a paset)

Kadagitoy pay a gundaway nga istoriaannakami ni tatang kadagiti kapadasanna kano kadagiti di-katatawan. Ti agpakpakita kenkuana a bola nga apuy tunggal mapan agliwliw iti buyon no kasta a kadawi dagiti dalag; ti padi nga awan ulona nga agpakpakita iti balite iti dalan nga agpahaywey; ti sansilmo a nasagangda idi nga agkakabsat a papanda pannakigapas; ti dakkel a billit a nangpayong kenkuana iti maysa a kaslag ‘diay bulan a papanna panagtarukoy; ti dakkel nga aso a gumaygayebgeb dagiti matana nga agparparang iti imburnal iti laud a ruaranda ken ni nanang no agpaplasada; kasta met ti panangispalna iti anak ti kabagianmi a mapapati nga innala ti sirena.

Nasapa a nagpabaybay ni tatang kadaydi nga aldaw tapno mapan agtabukol iti pangngaldawmi. Iti panagawidna, maysa nga ubing ti nakitana nga agkarkarayam iti pantok a sang-atanna. Ti ammona, adda dagiti nagannakna iti asideg. Ngem awanda. Nabigbigna daytoy a ti agdua ti tawenna nga apoko ti kapiduana. Idi masinunuona nga awan dagiti nagannak ti ubing, inubbanan nga inyawid daytoy a masmasdaaw no apay nga adda iti pantok ti ubing.

Idi makadanon iti purok, kasta unay gayamen ti panagsapsapul dagiti nagannak ti ubing. Nagpukaw kano lattan daytoy idinto nga adda laeng iti likud ti ina nga aglablaba iti asideg ti bubon. Sakbay a nagpukaw ti ubing, adda kano naangot ti ina nga agat-ikan (a di met nalangsi unay). Ti ammona, dagiti aglabas iti daya ti balayda a napan nakipagsang-at kadagiti nagsigay. Ngem idi agbalaw, awan gayamen ti anakna iti likudanna.

Sirena la ketdi daydiay naangotmo, kinunada kano iti ina ti ubing.

“Ngannganin ‘ta anakmo,” kinuna kano met ni tatang. “No awan dagiti pada nga agtabtabukol iti batog, nalabit nayawidnan iti pagarianda. Naala la ketdi ti nagbuteng dayta a sirena iti iketmi isu nga imbatina lattan iti kadaratan ti ubing.”

Napalalo a yamyaman ti kabagianmi ken ni tatang. (Adda itan pamilia ken annak daytoy nasao nga ubing—a babai. Naikamang iti kabangibangmi a barangay.)

Malagipko pay ita dagidi panawen nga itugottugotnak ni tatang iti bangkag. Aglalo dagidi panawen nga agkalida iti kamotit ken agparut iti mani. Dagiti pagpursinganmi iti mani wenno naalat-at a lanut ti kamotit, buntuonenmi ida, kaduak dagiti padak nga ubbing, iti sirok dagiti barakbak ken maratuyotuyo. Tarayenmi dagitoy a pagtamblingan. Anian a kinaragsak! Aglalo no mayayaben ti kalluto a mani ken kamotit.

Nupay kasta, adda latta da tatang ken nanang a di agpatpatingga a mangpatpatigmaan kadakami. Agannadkami ta narigat ti matukkolan.

Iti panagsasangomi iti sirok dagiti kayo, awan ngatan ti kararagsakan pay. Marikna la unay ti kinakameng iti pagtaengan.

Naglabasen dagidi a panawen. Ita, addan bukodko a pamilia. Ken binangon a pagtaengan. Ngem agnanayonda latta ditoy lagip. Naragsak a sublian ida iti lagip.

No kasano a pinadakkeldakami nga agkabsat, kasta met ita ti kayatko a pangpadakkel kadagiti bungami ken ni baket. Iti naganus pay laeng a panunot dagiti ubbingmi, ituktukitmin ti kinapateg ti adal, ti nakaparsuaan ken panagdaydayaw iti Namarsua.

Ket agingga’t mabalin, adda latta dayta panaglalanglang a kanayon tapno babaen itoy, maipariknami kadakuada ti kinapateg ti panagsasango a mangan.

Wen, simple laeng ti arapaapko iti binangonko a pagtaengan. Umdasen ti adda bassit masapulan—‘tay di makurkurangan, a di nagtaud iti maikaniwas nga aramid; makalpas dagiti ubbingmi iti adalda ken dumakkelda a manakem ken managbuteng iti Dios.

Ita a panawen ti Paskua, napateg ngarud a kitaen, utobentayo no kasanon ti binangon/impatakdertayo a pagtaengan. Anian ti rupa daytoy? Mayannatup kad’ pay laeng iti pagayatan ti Dios? Adda kad’ pay laeng dayta ayat nga agtataeng?

Sigurado nga addada dagiti banag a di mayannurot iti kayattayo a pagbanagan ti binangontayo a pagtaengan. Ngem saan koma a dagitoy ti pakaupayan—agserbida ketdi a kas stepping stone tapno baliwan ti umaddang a mangragpat iti inar-arapaap a naragsak a pamilia.

Kas iti nanumo a pamilia a nabukel sadi-Belen!#

Comments are closed.