Footer

Windshield ti 2 back hoe, naburak

CERVANTES, Ilocos Sur – Binurak dagiti di pay nabigbig a tattao ti windshield ti dua a back hoe a naiparada iti igid ti kalsada ti Barangay Aluling ditoy nga ili idi malem ti Nobiembre 27.

Naduktalan laeng da Rowel Cortez Valdez, 28, baro, residente iti Bagani Campo, Candon City ken Juanito Bonilla Galula, 47, naasawaan ken residente ti Brgy. Concepcion, Cervantes Ilocos Sur, ti pannakaburak dagiti windshield dagiti dua a back hoe a kukua ti maysa a Benedict Kamura ti Baguio City idi agsapa ti Nobiembre 28 ket dagusda nga inreport iti polis ti insidente.

Maar-aramat dagiti back hoe iti agdama a pannakakalsada ti Aluling Road ditoy nga ili.

Maipalagip nga idi Nobiembre 18, napuoran ti drilling rig a kukua met laeng ni Kamura a nangkontrata iti proyekto ti rangtay iti Barangay San Juan ditoy met laeng nga ili.

Agbalor iti maysa a million ti drilling rig a pinuoran dagiti di pay nabigbig a tattao.#