Footer

3 nagudas iti nagsasaruno a pammaltog

BURGOS, Ilocos Sur – Tallo a tattao a pakairamanan ti maysa a barangay kagawad ti nagudas iti pammaltog iti Cabugao, Sta. Lucia ken ditoy nga ili idi Disiembre 9 ken 10.

Nainaganan dagiti biktima iti pammaltog a da Ma. Christina Vitales y Mina, 48, barangay kagawad, residente iti Barangay Manaboc, Burgos, Ilocos Sur; Ceasario Rimarim, y Rafanan, 50, mannalon, residente iti Barangay Cuancabal, Cabugao, Ilocos Sur; ken ni Monroy Miguel y Aquino, 56, residente iti Barangay Bucao East, Tagudin, Ilocos Sur.

Nabigbig ti pimmatay ken ni Vitales a ti met laeng kaanakanna a ni Jonathan Dato y Mina, 32, naasawaan.

Segun iti polis, nakaidda ti biktima iti hammock bayat ti pannakitungtongna kada Kagawad Grace Barba, Gloria Dolormente ken Wilmer Dato idi kellaat nga immasideg ni Dato ken pinaltoganna ti ikitna a nakatiruan ti kilikili daytoy.

Naitaray ni Vitales iti Reyes Clinic and Hospital iti Sta. Maria ngem indeklara ni Dr. Junardin Soliven nga awanen ti biagna.

Inaresto dagiti polis ti suspek ket narekobre iti ikutna ti maysa a homemade Cal. 45 (one pong) a mapapati a pinangpaltogna iti ikitna.

Iti kaudian a report, nakasuanen ni Dato iti murder iti prosecutor’s office, Vigan City.

Iti sabali a bangir, mapapati a land dispute ti nakapapatayan ni Rimarim bayat ti panangrabiida ken ni Rosario a baketna iti uneg ti kalapawda iti tengnga ti kataltalonan idi sardam ti Disiembre 10.

Mapapati nga immasideg lattan ti di nabigbig a suspek sana pinaltogan ni Rimarim a nagsagrapan daytoy kadagiti sugat iti nadumaduma a paset ti bagina.

Naglibas ti suspek kalpasan ti pammaltog.

Naitaray ti biktima iti Suero General Hospital ngem indeklara ti doktor a nangtaming kenkuana a dead on arrival.

Nakarekobre dagiti inbestigador iti crime scene iti uppat a kapsula ken 2 a naiputok a bala manipud iti Cal. 45.

Nailanad iti blotter a land dispute ti mapapati a motibo ti pammapatay ngem saan a nadakamat no asino ti kariri ti biktima iti daga.

Kabayatanna, saan pay nga ammo ti motibo ti pannakapaltog ni Miguel, manadier/owner iti maysa a periaan bayat ti panagay-ayamna iti pool iti carnival ground a masarakan ti sango ti simbaan katoliko iti Barangay Ayusan, Sta. Lucia idi sardam ti Disiembre 10.

Mapapati nga immasideg lattan ti di nabigbig a suspek, pinaltoganna ti likud ti biktima iti sumagmamano a daras, sa naglibas iti saan nga ammo a direksion.

Naitaray ni Miguel iti Sta. Lucia District Hospital ngem pimmusay bayat ti pannakaagasna sadiay.

Nangisayangkat dagiti polis-Sta. Lucia iti hot pursuit operation maikontra iti suspek ngem negatibo ti resultana.

Nakarekobre dagiti inbestigador iti crime scene iti dua a kapsula ken maysa nga slug idinto a sabali pay nga slug ti naala ti doktor iti bagi ti biktima a mapapati a naiputok manipud iti cal. 45.#

Comments are closed.