Footer

Agkolkolekta iti basura, nagbitin

SAN ESTEBAN, Ilocos Sur – Nasarakan ti maysa nga agkolkolekta iti basura a nakabitin iti maysa a kayo sadiay Barangay Cabaroan ditoy nga ili idi agsapa ti Disiembre 9.

Nabigbig ti biktima a ni Jomar Tamayo y Guzman, 24, baro, ken residente iti nadakamat a barangay.

Naammuan iti report a nasukalan ti maysa a Joaquin Castro, Sr., 85, a nakabitin ni Tamayo a natalian ti tengngedna iti madre de cacao a masarakan iti katurodan a paset ti nasao a barangay.

Saan a nailanad iti report no ania ti motibo ni Tamayo a nangkettel iti biagna ngem inlatak dagiti kakabagianna a manmano nga aggawid ti biktima ken maysa a mannugal.

Nupay kasta, napakatan ni Tamayo iti post mortem examination tapno maammuan no adda foul play iti pannakatayna.#

Comments are closed.