Footer

Dagiti Siit iti Dalan ni PNoy

Kolum ni Danny Antalan
(Umuna a paset)
Kadatayo nga Ilocano, no adda biddut nga inaramid dagiti ubbingtayo, bauten ni Amang ti ubet dagitoy nga ubbing kas paset iti panangdisiplina kaniana tapno dinanton ul-uliten.

Rumbeng laeng kadi ngarud ti panangbaut ni Presidente Benigno Noynoy Aquino III kadagiti ubbingna a sekretario ti gabinetena ta masansan metten ti pannakairaman ti naganda kadagiti kunniber, kinapalpak ken panagkusit.

Kabayatanna a makunkuna a nalinteg ti dalan a turturongen ti presidente ti Pilipinas ngem adda met sabali ken bakkug a dalan ti pagdaldalanan dagitoy sumagmamano a gabinete. Resulta, maad-addaan ket ngarud ti siit dagiti dalan a pagpagnaan ti presidente. Ti rigatna, saan a makaarangkada ti pannagna ti mangidadaulo ta guyguyoden met ti kontrobersia dagiti ubbingna ti nadalus iti korupsion a naganna.

Mayat koman ti turong ti pagilian no di koma iti kontrobersial a nagan dagitoy a mangbukbukel iti administrasionna.

Ni Health Secretary Enrique Ona. Adda ita iti indefinite leave gapu iti isyo maipanggep iti panaggatang ti DOH iti agas para iti pneumonia iti pondo nga agarup iti P833 a million. Nagbalin a kontrobersial ti kaso ni Ona gapu iti pananggatangna iti PCV 10 a vaccine para pneumonia imbes nga iti PCV 13 a makunkuna a cost-effective. Ti dakesna, agpapan kadagitoy a gundaway, di met ammo no ania ti gasat ni Secretary Ona—nga isu met ti pakaigapgapuan ti demoralization dagiti empleado ti DOH ken panakaapekto kadagiti sumagmamano a serbisio iti nasao nga ahensia.

Department of Budget and Management Secretary Butch Abad ti maysa ngatan kadagiti kakontrobersialan a kameng ti gabinete ni Presidente Aquino. Nagad-adu a nagdalanannan nga isyo a pakairamanan ti Disbursement Acceleration Program wenno DAP ken ti alokasion dagiti pondo ti gobierno iti nadumaduma a proyekto. Nupay ni Sekretario Abad ti maysa a kapatgan a kameng ti gabinete ni PNoy, isu met laeng nga isu ti maysa a kabaraan ita. Mapan iti maysa nga unibersidad ket bansagenda ti kamatis wenno piltikenda ket kasla maysa lattan a normal a pasamak kenkuana. Awan ti imbestigasion kenkuana ta napigsa ket ngarud iti Malacanang ngem ketdi kanayon latta a maipilot-pilot ti naganna ti nadumaduma a kontrobersia.

Philippine National Police General Alan Purisima. Maysa nga Ilokano pay met ngem daksanggasat ta nairaman met ti naganna iti administrasion ni Presidente Aquino a maysa kadagiti nagpabaknang kabayatan ti panangiriendana iti kapulisan ti pagilian. Kabayatanna nga agsasaruno dagiti mapaspasamak a kriminalidad iti umili, makumikom met ti Heneral a mangsungsungbat kadagiti problema iti imbestigasion ti kasona a nalimed a kinabaknang ken panagkusit.

Pakairamanan kadagiti kontrobersial a maitudtudo a sanikuana ti sangapulo nga ektaria idiay Talisay, Batangas, ti nalawa ken napintas a sanikua idiay San Leonardo, Nueva Ecija, condominium units iti Belagio, Makati ken ti dakkel a porsiento iti panakaala kadagiti nagamar a luglugan.

(Adda tuloyna)

Comments are closed.