Footer

Masibbol uray karanggawisan nga arapaap no adda timpuyog ken panagkikinnamayyet

Sinurat ni Tatang Lakay

Nagrag-o ti sibubukel nga Ilocos Sur idi maiwaragawag idi Disiembre 7 daytoy a tawen a maysa ti Vigan kadagiti nabutosan a baro a pagsidsiddaawan a siudad iti sangalubongan. Iti pannakaibutos ti Vigan a maysa iti New7Wonders Cities of the World, naminsan pay a napaneknekan nga uray no kasano kangato ti arapaap no napasnek ken napinget ti tarigagay, kas kaamo ti kalapati nga agdisso iti dakulap.

Idi damdamo, dagiti la ngata agtuturay iti Vigan iti panangidaulo ni Mayor Eva Marie S. Medina ti mamati a malusotan ti Vigan dagiti abbeng iti dalan tapno mairaman a maysa kadagiti pito a pagsidsiddaawan a siudad iti sangalubongan. Kayarigan ti kampania ti Vigan iti New7Wonders Cities of the World ti ilalasat ti landok iti pasnaan agingga nga agbalin a natenneb a buneng.

No sabali laeng nga agtuturay ti nangidaulo iti Vigan, posible a napunas ti arapaap iti umuna pay laeng a waneswes ti dangadang. Ngem nakatuonen ti imatang dagiti agtuturay iti Vigan iti aringgawis no sadino nga agbibitin ti naisalsalumina a sabong a dagiti laeng natibker ken napnuan determinasion ti makakettel.

Saan nga asi-asi ti ilulusot ti siudad tapno mairaman a maysa kadagiti mapagpilian iti New7Wonders Cities of the World. Manipud iti 220 a pagilian, aganay a 1,200 a siudad ti immuna a nainominar a pagpilian a pakaitedan ti pammadayaw.

Manipud iti dayta a bilang, in-inut a naiwalin iti dalan dagiti siudad gapu iti nagduduma a rason kas iti kaawan wenno aleng-aleng nga interes dagiti agtuturay dagitoy a pagilian. In-inut met a nabati iti likud dagiti sumagmamano a siudad iti pagilian gapu ta dida nasbaalan ti makikumpas iti addang dagiti sabali a pagilian.

Kadagiti simmarsaruno a rikos, ad-adu manen dagiti naarus. Agingga iti nagbalin laengen a 28 dagiti nabatbati a siudad. Dagiti kaadduan, naglubada iti kawatiwat pay ti dalan. Saanda a nabaelan a tinaginayon ti pinget ken pigsada idi karugrugi ti kampania.

Ngem adda latta a nakatakder ti Vigan. Ket ditoy a naawisna ti imatang ti sangalubongan. Adtoy ti maysa a bassit a siudad nga iti baet ti kinanumona, kas kaandur ti narra a di kabaelan a tumbaen dagiti bangen iti dalan.

Saanen a nagpamayan dagiti agtuturay iti Vigan iti panangidaulo ni Mayor Eva Marie Singson-Medina ket inlungalongda ti napingpinget pay a kampania tapno agabante daytoy siudad iti top 21.

Nagsurat dagiti agtuturay kadagiti nadumaduma a dadaulo iti pagilian a pakaibilangan ti Simbaan tapno suportaranda ti kampania ti Vigan para iti New7Wonders Cities of the World. Nagpatulongda kadagiti nadumaduma a national agencies, dagiti nadumaduma a sektor, dagiti celebrities ken kadagiti lokal a gobierno tapno iyendorsoda ti Vigan City.

Aglaplapusanan dagiti suporta a simmangpet.

Nagbunga dagitoy a gannuat ti city government. Limsot ti Vigan iti top 14.

Ditoy a rinugian ti city officials ti all-out campaign para iti maudi a rikos. Nangiwayat ti city government iti raffle a nakaitanggayaan dagiti dadakkel a premio no sadino a tunggal butos babaen ti txt ket adda kaibatoganna nga entry.

Nagtignay met dagiti dadaulo ti probinsia ket inwayatda dagiti nadumaduma a panglakagan kas iti panangitudingda iti maysa nga aldaw a panagbutos dagiti government employees babaen iti txt kas suportada iti Vigan City.

Nangted pay da Gov. Ryan Singson ken Cong. Ronald Singson iti sagtunggal milion para iti text voting tapno nasigsigurado pay a lumsot ti Vigan iti New7Wonders Cities of the World.

Resulta: maysa ti Vigan City a nabutosan iti New7Wonders Cities of the World.

Ti makunami: rumbeng laeng a mangabak ti Vigan agsipud iti panagtitimpuyog, panagkikinnamayyet, ken panagmaymaysa dagiti agindeg iti siudad ken iti probinsia a nangsuporta iti daytoy a kampaniana.

Dayaw daytoy saan laeng dagiti agtuturay iti Vigan ken probinsia no di pay amin a timmulong iti daytoy a kampania a manamnama a mangitag-ay iti klase ti panagbiag dagiti agindeg ken uray ti pagilian!

Comments are closed.