Footer

Naikras a motorista, inatalan ti bus

SANTA, Ilocos Sur – Natay ti maysa a motorista gapu iti vehicular accident iti national highway a sakup ti Barangay Banaoang ditoy nga ili idi malem ti Disiembre 7.

Natay a dagus ni Marlon Rapanut y Magno, 31, naasawaan, construction worker, ken residente iti Barangay Fatima, Vigan City gapu iti panangatal kenkuana ti Hyundai Country Bus, rehistrado iti Candon City government, a minaneho ti maysa a Rolando Rulloda y Nimuan, 59, naasawaan, ken residente iti Barangay Talogtog, Candon City kalpasan a naikras ti Honda XRM a motorsiklona gapu iti pannakapukawna ti kontrol ti ti luganna idi nadiskalkulo iti yoobertekna koma iti nasao a bus.

Intaray dagiti nagresponde a polis ni Joel Raboy y Rabara, 18, baro, ken back rider ni Rapanut, iti Gabriela Silang General Hospital para iti pannakaagas dagiti sugatna.

Segun iti panagimbestiga dagiti polis, bayat ti isasang-at ti agpaabagatan a direksion a Hyundai Country Bus iti pagkurbaan ti national highway a sakup ti Barangay Banaoang, Santa, mapapati a nagobertek ti motorsiklo a minaneho ni Rapanut ngem adda simmungad a behikulo iti bangir a linia a nakapilitan ni Rapanut a nagsubli iti liniana ngem mapapati a napukawna ti kontrolna iti lugan a puon ti nakaikrasanna.

Mapapati a napilidan ti makannigid a pilid ti bus ni Rapanut a nagresulta iti dagus nga ipapatayna.

Segun iti report, awan ti helmet ni Rapanut ken awan ti lisensiana idi napasamak ti aksidente.

Nupay kasta, gapu iti panagareglo dagiti nagannak ti biktima ken ni Rulloda a saanen a dumanon pay ti kaso iti korte, ibilangen ti kapolisan a closed ti kaso.#