Footer

Napabaro a rangtay, nasilawan

CAOAYAN, Ilocos Sur – Maysan a pagpallailangan ti napabaro a rangtay a sumrek ditoy nga ili kalpasan a nainaguraran ken nasilawan itay nabiit.

Mismo a ni nalatak nga artista iti telebision ken pelikula Regine Tolentino ti nangipabuya iti laingna nga agsala Zumba iti inagurasion ken pannakasilaw ti nasao a rangtay a dinar-ayan a mismo ni Gov. Ryan Singson.

Kinuna ni Mayor Germie Goulart a ti pannakasilaw dagiti kalsada iti ili ken dagiti barangay ti maysa kadagiti prioridad a programana.

Kinunana pay a kalpasan a masilawan dagiti dadakkel a kalsada, sumarsaruno a masilawan dagiti kalsada kadagiti babassit a barangay.

Itay nabiit, nasilawan ti kalsada manipud iti Tamurong agingga iti Nansuagao.

Naammuan a sumarsaruno a masilawan ti kalsada manipud Anonang Bassit a dumanon agingga iti poblasion.#

Comments are closed.