Footer

Panangtagipen iti moral values, nayunay-unay

VIGAN CITY – Inyunay-unay ti Order of the Knights of Rizal Supreme Commander kadagiti agtutubo nga aywananda ti kinapateg ti moral values tapno saanda nga agbalin a corrupt inton dumakkelda.

Daytoy ti impasagepsep ni Order of the Knights of Rizal Supreme Commander Bokal Jerry Singson kadagiti nasurok 200 nga agtutubo ken mangisursuro manipud kadagiti nadumaduma a pagadalan sekundaria iti Division of Ilocos Sur iti naangay a kaunaan a Division Rizal Youth Leadership Institute (DRYLI) conference itay nabiit

Naangay ti nasao nga aktibidad kas panangisagana kadagiti agtutubo iti pannakipartisiparda iti Maika-52 a National Rizal Youth Leadership Institute Conference a maangay iti Teacher’s Camp, Baguio inton Disiembre 18-21, 2014.

Kinuna ni Singson a kangrunaan a gagem ti nasao nga aktibidad ti pannakapatan-ay ti nakadulin a talento dagiti agtutubo tapno agbalinda a nasayaat a lider iti masakbayan.

Kinuna ni Singson nga idi kanikasangapulo ket lima a tawen, ti kinapanglaw ti kangrunaan a karupak ti pagilian ngem ita, kangrunaan a karupakna ti graft and corruption idinto a linagidawna ti mapukpukawen a moral values dagiti lider ti pagilian.

Bayat ti DRYLI, naangay dagiti pasalip ket dagiti nangabak ti mangibagi iti probinsia iti masungad nga NRYLI conference sadiay Baguio.#