Footer

Bouncer ti bar, binagsol ti kostumer

BANTAY, Ilocos Sur – Binagsol ti maysa a baro ti bouncer gapu ta pinabasol ti naud-udi a nangburak iti sarming ti comfort room ti bar a naginuman ti suspek.

Naitaray ni Reynanto Carino, 37, ken residente iti Barangay Sinabaan, Bantay, iti Gabriela Silang General Hospital, Tamag, Vigan City para iti pannakaagas dagiti sugatna iti makannawan a barukongna ken iti makannigid nga imana idinto nga inaresto dagiti polis a nangiwayat iti hot pursuit operation ni Reymark Ragandac y Bankig, 23, ken residente iti Barangay Pantay Tamurong, Caoayan, Ilocos Sur.

Nagsubang da Carino ken ni Ragandac idi pinabasol ti bouncer ti suspek a nangbuong iti sarming ti comfort room ti Rendezvouz Bar agsipud ta isu ti mapapati a naudi a simrek.

Rimmuar ni Ragandac iti bar ngem sinurot ni Carino ket dita a binagsol ti suspek ti biktima.

Naglibas ti suspek ngem naaresto dagiti polis bayat ti hot pursuit operation sadiay Barangay 9, Vigan City.

Narekobre iti ikut ni Ragandac ti Swiss knife a mapapati a pinangbagsolna ken ni Carino.#