Footer

Ikkis iti Kasipngetan

Sarita ni Arnold Reyes
Umuna a Paset

NAEM-EM ti bibig ni Rudy a nangiddep iti selponna. Nagliad iti dekutson a tugawna, pinagakkupna dagiti dakulapna iti likud ti ulona sana minulenglengan ti puraw a bobeda ti opisinana. Dakes ti agparparikna kenkuana. Kuna ni Ikitna a Sianang nga agawid a dagus iti balayda. Emerhensia kano. Ngem dina met kayat nga ibaga no ania.

Simmiplot iti isipna ti tagtagainepna idi rabii. Agpapaarayat ni Lisa, ti kabsatna. Ania ti ipasimudaag ti tagainepna?

Ni Rudy ti editor ti Boses Amianan , nalatak nga aglinawas a pagiwarnak iti Siudad ti Sta. Barbara. Nangrugi iti baba, kas reporter, kolumnista, managing editor sa naital-o nga editor idi kanikadua a tawen. Criminology ti kursona ngem napigpigsa ti awis ti kinaagiwarwarnak ngem iti panagbalinna a polis.

Inawagan ni Rudy ti sekretariana. “Kanselem dagiti appointmentko. Agawidak iti balaymi. Amangan no agbayagak. Sika pay la ti makaammo ditoy,” imbilinna.

“Ania ti ibagak kadagiti reporters no adda masapulda kenka, sir?”

“Tawagannak iti selponko no problema,” insungbat ni Rudy.

“Wen, sir,” insungbat ni Wilma.

Dimmagas ni Rudy iti kaserana. Tallo a pantalon ken uppat a tisirt ti impisokna iti nangisit a travelling bag. Amangan ketdi no maibayag bassit iti balayda.

Madamdama pay, pampanurnorenen ti kotsena a Vios ti kalsada nasional nga agpaamianan. Manipud iti siudad, aganay a tallupulo a minutos laeng a daliasaten ti lugan agingga iti Sta. Monica nga ilida. Manipud met iti poblasion, nasurok a pito a kilometro ti taraten ti kotsena agingga iti Limmansangan a barangayda. Pagsayaatanna ta kongkreton ti kalsada, saan a kas idi kanikalima a tawen a kabatuan, pagyamanan iti RA 7171 a pagnanaaran ti probinsia ken ti ilina.

Bayat ti panagdaliasatna, saan a makaidna ni Rudy. Dina maawatan no apay a dakes ti agparparikna kenkuana. Dina maiwagat ti tagtagainepna. Yad-adayom, Apo! naitanamitimna.

Dandanin agpakada ti init idi makadanon iti Sta. Monica. Linabsanna ti tiendaan a mangrugin a maakasan kadagiti aglaklako iti bawang ken lasona.

Idi malabsanna ti simbaan, pinanurnorna ti agpalaud a kalsada. Kataltalonanen. Ngem iti daytoy a gundaway, awan ti payapay kenkuana dagiti bumalitoken a pagay a kasla mannala nga aglunglung-ay iti aplaw ti angin-Amian, wenno taringgawid dagiti billit-tuleng nga agalis-alis kadagiti sanga dagiti kakawati ken kamantiris iti igid ti dalan sakbay nga agpaknida iti aponda.

Sa la nabang-aran ni Rudy idi masaripatpatanna ti sementado a rangtay iti sungaban ti Barangay Limmansangan. Iti labes daytoy ti yan ti pagtaenganda.

Ngem nagbalaw laengen ni Rudy ta naipasabat kenkuana dagiti nataratar a traysikel ken dadduma pay a lugan iti igid ti kalsada iti asideg ti balayda. Apay nga adu ti tao iti balayda?

Impaigid ni Rudy ti luganna. Dimsaag. Naitangkarang iti matana ti dua kapuon a kayo a bumegbeggang iti puyot ti puyupoy. Temtem!

Kellaat a nagdissuor iti panunotna dagiti balikas ti ikitna. Ammona itan a nagminatayda!

Bitbitna ti bagna, simrek iti inaladanda. Naulimek a kumitkita kenkuana dagiti agmamadiong iti sanguanan ti balay a napalapalaan ken naaplagan iti trapal.

Addaytan da Ikitna a Sianang ken Ulitegna a Celin. Agsangsangit ni ikitna a Sianang nga immarakup kenkuana. Pinikpik met ni Ulitegna a Celin ti bukotna.

“D-da Papang ken Mamangmo, awandan!” insaibbek ni ikitna.

Iti apagdarikmat, inaskaw ni Rudy ti paraangan. Naitukem iti ridaw. Ti amana ken ti inana a nakamassayag iti salas! Naglulok dagiti tumengna.

Inwarasna ti panagkitana iti uneg. Adda birbiroken dagiti matana. Ngem awan ti nakaitured kadagiti adda iti uneg a nakipinnerreng kenkuana.

Nagsaltek ti panagkitana ken ni Andy, ti kaayan-ayat ti kabsatna a babai, a nakatakder iti sikigan dagiti lungon. Pinetpetan ni Andy ti dakulapna kas pannakipagriknana.

“Ni Liza?” sinaludsodna.

“A-adda iti ospital,” insungbat ni Andy.

“Ania ti napasamak?” dinamagna kalpasan a maallangonna ti riknana.

Napagsisilpo ni Rudy dagiti pasamak. Nagbakasion ni Liza. Nagpakuyog dagiti dadakkelna ken ni Andy a mangsabat ken ni Liza. Ngem iti dalan, nabtak ti pilid ti lugan dagiti dadakkelna. Nagsubli ni Andy iti purokda tapno alaenna dagiti arimienta a pangsukatna iti pilid. Da Papang ken Mamangna ti nagtuloy iti ili. Alas tres ti parbangon ti intext ni Liza nga isasangpetna.

Segun iti panagimbestiga dagiti polis, agsublin dagiti dadakkelna ken ni Liza iti purokda idi sinaneb ida ti tallo a nabartek a lalaki. Inulodda nga indissaag ni Liza. Nakiranget ti amana ket binagsol ti maysa kadagiti nagsaneb. Insarunoda ti inana. Rinamesda ni Liza sada binagbagsol kalpasanna.

“Naisalakanen ni Liza,” kinuna ni Andy, “ngem nagblangko ti panunotna iti nadagem a napasamakna.”

Kellaat, immulo ti dara iti ulo ni Rudy. “Sino dagiti nagaramid?” dina napupuotan a yinugyog ti abaga ti gayyemna.

“A-awan nakasaksi iti napasamak,” kinuna ni Andy.

Kasla napaksuyan ni Rudy a nagtugaw iti sopa. Nagkitem ti sangina. Kapkapnekanna a saan a panagtakaw ti motibo ti pammapatay. Saan nga agikuykuyog ni Tata Baldo ken ni Nana Lucrecia iti dakkel a kuarta no rummuar iti balayda. Saan met a maibilang ti pamiliada a nabaknang unay nupay makuna metten a saanda a makurkurangan iti biag.

Am-ammo ni Liza dagiti nangsaneb kadakuada? Maysa kadagiti binastedna iti ayat?

Asinoda man, sagrapenda ti pammalesna! ingngarietna.

(Maituloyto)

Comments are closed.