Footer

Ikkis iti Kasipngetan

Sarita ni Arnold Reyes
Maikatlo a Paset

NAGTUGTOG ni Rudy iti ridaw ti opisina ni Hepe Juan dela Cuadra sakbay a simrek.

“Agtugawka, Rudy,” kinuna ni Hepe dela Cuadra.

“Ania ti update ti panagpalutpotyo maipapan iti pannakapapatay da Papang ken Mamang, Hepe?” dinamag ni Rudy.

“Adda dua a mannalon a naalaanmi iti palawag iti rabii a pannakapasamak ti krimen.

Iti agarup alas tres y media, magmagnada iti tambak nga agturong iti pangawidanda iti padanum idi makangngegda kadagiti garakgak a sinaruno ti ikkis ti babai. Iti pattapattada, naggapu ti ikkis iti kaleddaan iti pasetna a naiputputong ti kalsada. Ngem nagbutengda nga immasideg ta dida kayat ti mairamraman.”

“Kasano pannakasiguradoda nga agarup alas tres y media iti parbangon idi nakangegda iti asug ken ikkis iti kasipngetan?” sinaludsod ni Rudy.

“Adda kuyog a selpon ti maysa a mannalon. Liningdanna ti selponna sana kinitana ti oras.”

“Awanen ti nangegda pay kalpasanna?”

“Nagkulmeg dagiti mannalon iti kasamekan sada nagalingag. Nangegda ti panagpakpakaasi ti babai sa dagiti timek-lalaki a kasla mangkankantiaw kenkuana. Ngem idi agdadaraddanen ti ikkis ti babai, madanagan unayen ti maysa kadagiti saksi ket dinagdagna dagiti kakaduana a pumanawdan isu a nagarudokdan nga immadayo.”

Nagari ti ulimek iti nagbaetanda.

“Di la mabalin a maammuan ti nagan dagiti mannalon, Hepe?” kinunana idi agangay. “Kayatko a kapatang ida bareng adda maarisitko kadagiti palawagda.”

“Kuyogenka inton malem ta kapatangta ida,” kinuna ni de la Cuadra. “Addada pay la iti talon kadagitoy nga oras ta ammom metten katibok ti panagatud iti bulong iti tabako.”

“Yamanek unay, Hepe, no kaduaennak.”

“Ngem dida kayat a mairakurak ti kinasiasinoda agingga iti saan a matiliw ti kriminal. Nupay kasta, desididoda nga agtestigo no kasapulan.”

“Malaksid dagiti tallo a mannalon, awanen ti sabali a nakalapyo nga impormasion a potensial a makatulong iti pannakarisut ti kaso, Hepe?” sinaludsod ni Rudy.

“Inayabanmi ni Dante ket pinagsaludsodanmi mainaig iti panangipangtana ken ni Liza idi binasted daytoy. Sao la kano ti nabartek, kinunana. Ken napigsa ti alibi ni Dante. Iti oras a mapattapatta a pannakaisayangkat ti pammapatay, addada ken ti barkadana a naggiinom iti La Patria Videoke Bar. Pasado alas tres kano iti parbangon idi nagawidda.”

“Sino dagiti kaduana a nagginom iti La Patria Videoke Bar?”

“Ni Cito ken Mikong a barkadana. Pinaneknekanda a naggiinomda iti La Patria Videoke Bar. Nagblow-out kano ni Dante iti dayta a rabii ta nangabak iti hueteng.”

“Nakapatangyo ti manedier iti videoke bar no adda kinatebol da Dante iti dayta a rabii?”

“Wen, nakapatangmi ti manedier ti paginuman ken ti kinatebolda ket pinaneknekanda a naggiinom da Dante iti bar,” kinuna ni Hepe Juan de la Cuadra. “Kinapudnona, kalpasan ti panaggiinom ti grupo, nangiruarda iti saggaysada a babai iti agarup ala una iti parbangon.”

“Nangipananda kadagiti babbai?”

“Iti panagsalsaludsodmi, napanda iti Salinas Beach Resort. Dua orasda iti resort. Insublida dagiti babbai iti pasado alas tres ti parbangon sada naggawid.”

Naapiras ni Rudy ti timidna.

“So back to square one, Hepe?” kinuna ni Rudy.

Nagtung-ed ni Hepe dela Cuadra. “Ngem adda nasarakanmi a narumek a selpon iti kasamekan, agarup lima a metro ti kaadayona manipud iti nakapapatayan da Papang ken Mamangmo. Adda inisialna a L.A.M.”

Binilin ni Hepe dela Cuadra ti polisna a mangiruar iti selpon. Intedna ken ni Rudy.

“Mailasinmo daytoy selpon?” inamad ni Hepe dela Cuadra.

Nagtung-ed ni Rudy kalpasan a binidingna ti selpon. Kasla napaksuyan a nagliad iti plastik a tugaw iti sango ti lamisaan ni dela Cuadra.Nupay narumek ti selpon, kapkapnekanna a kukua ni Liza daytoy. Dua ti ginatangna a selpon idi napan a tawen. Inregalona ti maysa ken ni Liza. Pinakitikitanna iti L.A.M. ti balay ti selpon.

“Naigagara a naibaddek wenno nataltal ti selpon,” kinuna ni Hepe dela Cuadra. “Suspetsak a di kayat ti kriminal a maammuan no ania ti linaon a mensahe ti selpon.”

“You’re right, hepe,” kinuna ni Rudy. “Ngem awan metten ti sim card ti selpon. Siguro, inuyos ti kriminal tapno awanen ti pakaammuan no ania dagiti mensahe iti selpon.”

“Ha! Ha! Dayta ti nagbiddutanna,” kinuna ni Hepe dela Cruz. “Lesson No. 1: Never underestimate the police. Saan a nakuneng amin a polis…”

“No kasta, adda kenka ti sim card?” limmawag ti rupa ni Rudy,.

Umis-isem ni Hepe dela Cuadra a nagtung-ed.

“Kasano a nabirokanyo ti selpon, Hepe?” inamad ni Rudy.

“Nasarakanmi ti selpon iti kasamekan bayat ti panagbirokmi iti patadem a naaramat iti pammapatay iti aglawlaw ti nakapasamakan ti krimen. Posible nga impalladaw ti kriminal kalpasan a dinadaelna.”

“Nasarakanyo ti patadem?”

“Saan. Posible nga adda pay la iti ikut ti kriminal!”

(Maituloyto)

Comments are closed.