Footer

Ikkis iti Kasipngetan

Sarita ni Arnold Reyes
Maikalima a Paset

DIMSAAG ni Rudy iti dyip sana tinangad ti init. Mabaddekannan ti anniniwanna. Nagmattider iti kawayan nga alad ti pagtaengan ni kapiduana a Siano idinto a naggapo. Dimmuklos ti labang nga aso.

Ni kapiduana a Siano ti gagara ni Rudy. Isu laeng ti adda traysikelna iti Barangay Camantirisan. Aganay dua gasut a metro ti kaadayo ti balayda iti kalsada a nakadadaelan ti dyip a nagluganan dagiti dadakkelna ken ni Liza iti daydi a rabii a pannakapapatayda.

Inulit ni Rudy ti naggapo. Madamdama, nakangeg iti kayaskas ti sinelas iti datar a kawayan sa nailukat ti ruangan a sinigpit a nipa. Timmammidaw ni Florence, ti asawa ni Siano.

“Ne, sika gayam Manong. Umunegka,” inyawis ni Florence.

“Awan ni kapid?” kinuna ni Rudy idinto nga inwarasna ti panagkitana iti uneg.

“Napan nagkames, Manong. Isagsaganak ngarud ti pangngaldawna. Apay kadi?”

“Di la naidaw-as ditoy da Papang ken Mamang idi rabii ti Hulio 8?” sinaludsod ni Rudy. “Iti daydi a rabii, sabtenda koma ni Liza iti estasion ti Pardas ngem nadadaelan ti luganda ket mabalin nga immayda ditoy nagpaitulod a nagpaili.”

“Dida immay ditoy balay, Manong. Di ngata nagnagnada a nagpaili?” nakuna ni Florence.

“Mabalin a kasta,” kinuna ni Rudy nupay agpangadua nga aramiden dayta dagiti dadakkelna. Nakurang a maysa a kilometro ti kaadayo ti pagnaenda. Ken maysa, delikado ta parbangon ken awanen ti matagtagitao iti langalang no kasta nga oras.

“Awan met ti banurbor ti traysikel a limmabas iti daydi a rabii. Dyip ketdi a ti nangegko a limmabas,” kinuna ni Florence.

“Ania oras ti pattapattam idi limmabas ti dyip?”

“Pasado alas tres siguro, Manong.”

“Kasano pannakaammom a pasado alas tres?”

“Nakariingakon iti dayta nga oras ta insetko ti alarm ti relomi nga agkiriring iti alas tres. Masakit ngamin iti daydi a rabii ni Arnel ket alas tres ti panagtomarna iti agasna, Manong.”

“Agpaili ti dyip?”

“Diak masigurado no agpaili, Manong. Ngem siguraduek a kalpasan ti alas tres idi limmabas ti dyip.”

“Adda selponmo, saan?” inamad ni Rudy. “No adda malagipmo a karkarna iti daydi a rabii, di la mabalin nga itawagmo kaniak?”

Nagtung-ed ni Florence. Innala ni Rudy ti numero ti selpon ni Florence, sana insurat ti numero ti selponna tapno adda pagkinnontakanda.

Saanen a nagbayag ni Rudy kalpasan nga imbagana nga idanonto laengen ni Florence ti pakomustana ken ni Siano.

Nagsubli ni Rudy iti dyip. Nagliad iti tugaw. Namulenglenganna ti manibela.

No kasta, saan a naglugan iti traysikel dagiti dadakkelna idi nadadaelan ti dyipda. Kasano a nakadanonda iti ili a simmabat ken ni Liza?

Adda naggilap iti panunotna. Tinawaganna babaen ti selpon ni Hepe dela Cuadra.

“Adda nasarakanyo a selpon, Hepe?” sinaludsodna.

“Negative,” insungbat ti hepe. “Pinaulitko pay a pinagbirok dagiti polisko.”

“Malagipko dagiti dua a mannalon, Hepe. Pakasarakak kadakuada?”

“Taga-Brgy. Capangdananda. Apay kadi?”

“Kayatko a kapatang ida bareng maibagada ti eksakto nga oras a pannakangngegda kadagiti timek-lalaki ken ikkis ti babai.”

“Saan a sierto ti oras ngem iti pattapattada, agarup alas tres y media ti rabii.”

“Awanen ti sabali pay a mainayonda a makatulong iti pannakarisut ti kaso?”

“Dayta laeng. Ngem nadakamatda nga adda lugan a limmabas iti batogda tallopulo minutos wenno nasursurok pay kalpasan ti pannakangegda iti ikkis ti babai iti kaleddaan.”

“Ania a lugan: dyip wenno motorsiklo? Agpalaud wenno agpadaya nga agpaili?”

“Ungor ti motorsiklo ti nangegda. Aggargarakgak kano dagiti naglugan a pimmanaw. Agpaili ti direksion ti lugan, kasta ti kunada.”

“Mano ti pattapattada a naglugan iti motorsiklo?”

“Tallo kano, segun kadagiti boses a nangegda,” kinuna ni Hepe de la Cuadra. “Wen gayam, nadamagmo kadin? Itay agsapa, nasarakan a tumtumpaw ni Cito iti bubon iti likudan ti balayna. Nakaro kano ti bartekna idi rabii ket posible a natinnag iti bubon ket nalmes.”

Nagkusipet ni Rudy. Natnag ni Cito iti bubon a puon ti nakalmesanna wenno adda nangiduron kenkuana?

(Adda tuloyna)