Footer

Ikkis iti Kasipngetan

Sarita ni Arnold Reyes
Maikanem a Paset

“Ania ti resulta ti autopsia ni Cito, Hepe?” sinaludsod ni Rudy kalpasan ti sumagmamano a minutos a panagulimekna.

“Natay ni Cito babaen ti pannakalmes, segun iti report ti doktor a nangautopsia kenkuana,” kinuna ni Hepe dela Cuadra.

“Awan ti sugat ni Cito, Hepe, a mabalin a nakaulawanna a puon ti nakatnaganna iti bubon?”

“Aguray ta basaek manen ti autopsia ti doktor, kinuna ni Hepe de la Cuadra. “You’re right, adda dunor iti likud ti ulo ni Cito. Kas impalawag ti doktor iti autopsiana, posible a naitibkol ni Cito ket naitupa ti ulona iti ngarab ti lusob sa natnag iti bubon. Ngem agsipud ta saan a makakalay-at, in-inut a kimmapsut agingga iti naarinebneb ken nalmes.”

Saanen a nagtimek pay ni Rudy. Ngem saan a mapnek iti nailanad iti autopsia. No naitibkol ni Cito, ti rupana koma ti maitupa iti ngarab ti bubong, saan ket iti likudan ti ulo!

“Bukodko laeng nga opinion daytoy, Hepe. Adda met posibilidadna a napalek ti likud ti ulo ni Cito sa naitapuak iti bubon.”

“Posible dayta. Bay-am ta mangiwayatkami iti naun-uneg nga inbestigasion no adda foul play iti pannakatay ni Cito.”

Nagyaman ni Rudy sana iniddep ti selpon. Nagliad iti tugawna sana pinagsinanggala dagiti ramayna iti likud ti ulona. Minatmatanna ti bubeda a kasla adda mulmulimolan ti panunotna.

No pudno ti suspetsana nga adda foul play iti pannakatay ni Cito, ania ti motibo? Adda kadi ammo ni Ciano a kasapulan a maipakni tapno saanna a maipalgak kadagiti autoridad?

Nagkusipet ni Rudy. Karaman ni Cito iti grupo ni Dante a napan naggiinom iti beerhouse iti daydi a rabii. Segun iti panagpalutpot dagiti polis, naguperda iti beerhouse agingga iti ala una sada nangiruar iti saggaysada a babai. Pasado alas tres ti parbangon idi isublida dagiti babbai iti beerhouse.

Kalpasanna, nagsisina kadin dagiti nagkukuyog? Wenno adda pay sabali a napananda?

Immagibas iti panunotna ti statement dagiti dua a mannalon a mapan agpalayas iti talonda iti daydi parbangon a pannakapapatay dagiti dadakkelna ken pannakarames ni Liza: tallo dagiti nangegda a timek-lalaki nga aggagarakgak a pimmanaw iti nakapasamakan ti krimen a pattapattaenda a napasamak iti agarud alas tres y media.

Timmawag ni Rudy ken ni Andy ket dinamagna ti barangay a yan ti balay da Dante.

“Iti Caarusipan, Manong, insungbat ni Andy. “Apay kadi?”

Saan a simmungbat ni Rudy. No taga-Caarusipan ni Dante, daldalanenna met ngarud ti kalsada nga agpa-Limmansangan. Kalpasan ti Limmansangan dua pay a kilometro sakbay ti Barangay Caarusipan.

“Nadakamatmo a nagpangta ni Dante idi binasted ni Liza. Iti panagkitam, maituredna nga aramiden ti pangtana?”

“Diak ammo, Manong. Ngem awanen daydiay ta nagpadispensar met laeng ni Dante. Saan payen a timmamtammidaw iti balayyo no agaw-awid ni Liza.”

“Iti daydi a parbangon a pannakapapatay da Papang ken ni Mamang, saanyo a nasalsalapon da Dante?” kellaat a sinaludsod ni Rudy. “Damagko nga iti daydi nga aldaw, dakkel ti inabak ni Dante iti hueteng ket napanda naghapi-hapi kada Cito ken Mikong a nagginom iti beerhouse.”

“Saan met. Aginggada a nagginom iti beerhouse?”

“Agingga iti ala una sada nangiruar iti babbai. Insublida dagiti babbai iti beerhouse iti pasado alas tres. No naggawid ni Dante kalpasanna, adda posibilidadna a nageengkuentrokayo iti daydi a parbangon.”

“Dimi nakaengkuentro ni Dante. Baka saanda pay a naggawid ta adda pay sabali a napananda.”

“Nadamagmon ti napasamak ken ni Cito?” binaliwan ni Rudy ti topiko.

“Wen, Manong. Natinnag kano ken nalmes iti bubon. Kasla diak patien a nalmes iti bubon ta nalaing a lumangoy. Nakaro ngata unay ti bartekna ta nalmes idinto a pagatbarukong laeng ti danum iti bubon ta kalgawen ket nakidditen ti ubbog,” kinuna ni Andy.

“Suspetsak a napapatay ni Cito,” kinuna ni Rudy. “Adda dumdumges iti panunotko nga adda pannakaibiang ti pannakatayna iti daydi pannakapapatay da Papang ken ni Mamang, ket daytoy ti anggulo a kayatko a naing-inget a maimbestiga!”

(Adda tuloyna)

Comments are closed.