Footer

Agtuturay ti Vigan City, sagsaganaandan selebrasion ti pannakapadayawna a New7Wonders City of the World

VIGAN CITY – Agsagsaganan dagiti agtuturay ti Vigan City iti panangidaulo ni Mayor Eva Marie S. Medina iti selebrasion ti pannakapadayaw daytoy siudad kas maysa iti New7Wonders Cities of the World a maangay inton Mayo 7 daytoy a tawen.

Maigiddan ti selebrasion ti deklarasion ti Vigan a kas New7Wonders City iti panangrambak ti Siudad ti Vigan iti Binatbatan Festival a tinawen a maang-angay iti Mayo kas panangitandudo iti abel a produkto ti siudad.

Segun ken ni Medina, addan kumpirmasion manipud ken ni Paul Webber, pundador ken presidente iti New7Wonders, nga umay iti Siudad ti Vigan inton Mayo 7 tapno isuda a mismo ti mangideklara ken mangiyawat iti plake kas pakabigbigan ti Siudad ti Vigan kas maysa iti New7Wonders Cities of the World.

Mapattapatta a rinibribu a sangaili ken nangangato nga agtuturay ti dumar-ay iti selebrasion a manamnama nga ad-adda pay a mangpadur-as iti turismo saan laeng ditoy siudad no di pay iti intero a pagilian.

Iti pannakiuman kenkuana ti media, kinuna ni Medina a rinugiandan ti agipatulod iti inbitasion kadagiti nangangato nga opisial iti pagilian ken dignitario para iti idadar-ayda iti daytoy a pasken nga ibilang ti mayora a kadakkelan a selebrasion nga angayen ti Siudad ti Vigan agsipud iti pannakapilina a maysa iti New7Wonders Cities of the World idi Disiembre 7.

Kinuna ni Mayor Medina a kiddawenda ti audience manipud iti opisina ni Pres. Noynoy Aquino tapno personal nga iyawatda iti presidente ti inbitasionda.

Innayon ni Medina nga iti umuna a lawas ti Marso ket rinugianen dagiti ubbing a partisipante iti selebrasion ti agpraktis iti salada.

Kinuna ti mayora nga addanto maipabuya a dance-o-rama a pakaitampokan iti historia ti Vigan City manipud idi panawen dagiti Chinese traders ken isasanglad dagiti Kastila, yaay dagiti Amerikano, panangsakup dagiti Hapon iti Vigan idi maikadua a gubat ti sangalubongan, agingga iti panagbalinna a siudad.

Malukaisanto met bayat ti selebrasion ti New7Wonders marker a maikabil iti triangle iti sango ti city hall, kinuna pay ni Medina.#