Footer

EDITORIAL: 15 ti tawenen ti Tawid News Magasin

Nagdaras ti pannakalapsi dagiti panid ti tawen ket dimi napupuotan a 15 gayamen ti tawen ti Tawid News Magasin. Wen, patpatgenmi nga agbasbasa, sabali manen a tawen ti nalayaw daytoy pagiwarnaktayo iti baet dagiti kalamidad ken didigra a nangsanot iti pagiliantayo ken panagngina amin dagiti tagilako, nangruna iti magastos iti imprenta. Kanaig daytoy, siinanamakami nga adunto pay a tawen ti malayaw daytoy pagiwarnaktayo babaen ti panangsappuyot, panangilala ken panangipategyo.

Nasam-it ti manglagip iti napalabas, dagiti naglasatan ti Tawid News Magasin a pannubok, rigat ken sakripisio tapno laeng maidanonmi kadakayo dagiti kabaruanan a damag ditoy Ilocos Sur ken dagiti kaparangetna a probinsia, kasta met dagiti mapaspasamak iti intero a pagilian. Iti unos dagita a tawen, sitatangsitkami a mangibaga nga inaramidmi amin a kabaelanmi tapno maikari daytoy a pagiwarnak a basaen dagiti amin a kailian nga Ilokano, ditoy man Ilocos Sur, iti pagilian ken uray iti ballasiw-taaw a pagtrabahuan ken pagtaenganda itan.

Ngamin, daytoy ti mission ti pagiwarnaktayo: ti agpaay a rangtay dagiti amin nga Ilokano, sadino man a lugar ti ayanda, tapno mataginayon ti kultura, kannawidan, ken nakaugalian iti nagtaudanda a probinsia babaen dagiti damag, salaysay ken sarita a linawas a laonenna.

Iti daytoy maika-15 a panagtawen ti Tawid News Magasin, baliwanmi nga ipaganetget nga ad-adda manen ti panangigaedmi nga ipadanon latta iti ridawyo dagiti kabaruan a damag, makaited-adal a salaysay ken makalinglingay a sarita a nagbalin a marka daytoy pagiwarnaktayo. Agtultuloy met ti panagbalin daytoy pagiwarnaktayo a rangtay babaen ti www.tawidnewsmag.com ta daytoy ti kapardasan a wagas a panangidanon dagiti mapaspasamak iti Ilokandia kadagiti amin a lugar a pagindegan dagiti kakailian.

Iti daytoy maika-15 nga anibersario ti Tawid News Magasin, iyawatmi ti nabara a kablaaw ken panagyamanmi. Dios ti agngina kadakayo amin!