Footer

Mangngalap, naalaw nga agkatangkatang iti baybay

CAOAYAN, Ilocos Sur – Baro a biag iti daytoy a mangngalap ta nalasatanna ti bisin ken waw iti panagkatangkatangna iti kabaybayan kalpasan a nakaro a nadadael ti luganna bayat ti panagkalapna iti taaw idi Pebrero 22.

Dua nga aldaw ken dua a rabii a nagkatangkatang ni Alfredo Macoroy, Jr. y Ballesteros, 59, naasawaan, ken residente iti Barangay Alzate, Bangar, La Union sakbay a naalaw ti maysa a mangngalap iti kabaybayan a paset ti Barangay Villamar, Caoayan idi agsapa ti Pebrero 24.

Iti report manipud iti kapolisan ti Caoayan, iti parbangon ti nadakamat a petsa, nasalaw ni Orlando Barrientos y Quiocho, 54, naasawaan, presidente iti fishermen’s club iti Barangay Villamar, ni Macoroy nga agkatangkatang iti kabaybayan a paset ti Barangay Villamar.

Iti inisial nga inbestigasion dagiti polis, naammuan nga idi parbangon ti Pebrero 22, timmapog iti taaw tapno agkalap ni Macoroy a naglugan iti motorized a bangkana.

Iti panangisalaysay ni Macoroy, maysa a dina nabigbig a behikulo ti nangdungpar iti bangkana a puon ti nakaro a pannakadadael ti luganna.

Pagyamanan ta nagammatan ni Macoroy ti maysa kadagiti pataw ti bangkana ket daytoy ti inaramatna a pinagpataw iti taaw iti agarup dua nga aldaw ken dua a rabii agingga a naiyanud iti kabaybayan a sakup ti Barangay Villamar.

Kabayatanna, kalpasan ti pannakasalaw ni Barriento ken ni Macoroy iti taaw, inyawidna iti balayda sana impakaammo iti polis ti insidente.

Nakikoordinar ti polis-Caoayan iti Bangar police station para iti pannakaipakaammo kadagiti kabagian ti biktima ti pannakaalaw daytoy iti kabaybayan ken iti panangiyawidda kenkuana.#