Footer

Ikkis iti Kasipngetan

Sarita ni Arnold Reyes
Maikawalo a Paset

KINSE minutosen a naka-mulengleng ni Rudy iti monitor ngem dina mabukel ti editorial ti pagiwarnak para iti sumuno a lawas. Kasla blangko ti panunotna. Namin-anon a binurana dagiti inrugina nga immuna a parapo.

Iniddep ni Rudy ti kom-piuter. Pinagsinanggalana dagiti ramayna iti likud ti ulona sa nagliad iti tugawna idinto a minulmolan ti panunotna dagiti impormasion a nasa-gapna iti napalabas a maka-lawas.

Nakapatangnan ti doktor a nangautopsia ken ni Cito. Pinaneknekan daytoy a natangken a banag ti naka-gapu iti sugat ti ulo ni Cito. Ngem nupay kinuna ti doktor a posible nga awanen ti puot ni Cito idi nanabsuok iti bubon, awan duadua a panna-kalmes ti puon ti ipapatayna.

Inannugot ti doktor a posible a napalek ni Cito ngem kinunana nga ad-adda a patienna a nabaliktad daytoy gapu iti nakaro a bartekna ket naitupa ti likud ti ulona iti iking ti lusob sa nanabsuok iti bubon. No napalek ni Cito, apay nga awan ti nasarakan dagiti inbestigador a daradara a kayo wenno tubo wenno aniaman a natangken a banag iti asideg ti bubon? sinaludsod pay ti doktor.

Immanges iti nauneg ni Rudy idinto a naapirasna ti mangrugin nga agtubo a barbasna. Adda lohika ti palawag ti doktor a nangautopsia ken ni Cito. No adda foul play iti pannakatay ni Cito, ania ti motibo?

Idi naireport a nalmes ni Cito, pinagsiput ni Rudy ni Andy no ania ti tignay da Mikong ken ni Dante agsipud ta dagitoy ti kabarkada ni Cito. Iti panirigan ni Rudy, no pudno ti suspetsana a napapatay ni Cito, posible nga adda laeng nga umar-arubayan ti pimmatay, agsipsiput met iti aniaman a nakadidillaw a garaw, nangruna iti panagimbestiga dagiti polis no adda suspetsada a foul play iti pannakatay ni Cito. Ngem idi agsaludsod ken ni Andy maipapan kada Mikong ken Dante, insungbat daytoy a daydi laengen malem a pannakalabasna kadakuada iti tianggi nga umin-inom ti kaudian a panagkuyogda. Impadamag pay ni Andy nga iti bisperas ti tabon ni Cito, bayat ti panaggiinom da Mikong ken sumagmamano a kalugaranda, naisalpika ni Mikong a nagku-kuyogda kada Cito ken Dante iti daydi a rabii ket nupay nakainom daytoy, saan a kasta ti kabartekna tapno matinnag iti bubon a nakalmesanna.

Pagammuan, napaunnat ni Rudy iti tugawna idi immapay iti panunotna ti resulta iti maikadua a panagsawar da Hepe dela Cuadra ngem awan ti nasarakanda a selpon ni Papangna iti aglawlaw ti nakapasamakan ti krimen. Kellaat a napasanamtek. Posible nga adda pay laeng ti selpon iti ikut ti kriminal!

Timmawag ni Rudy ken ni Ulitegna a Cilin. Dinamagna no ammo daytoy ti numero ti selpon ni Papangna.

“Diak kabisado,” insungbat ti ulitegna. “Agurayka ta damagek ken ni antim.”

Madamdama, simmungbat ni antina. Inted daytoy ti numero ti selpon ni Papangna.

Minulenglengan ni Rudy ti numero nga insuratna. Apay a dina napanunot dayta idi kapatpatay di amana? No adda ti selpon iti ikut ti maysa kadagiti pimmatay iti amana, dakkel koma ti posibilidad a simmungbat daytoy.

Kalpasan nga inkabil ni Rudy ti numero ti selpon di amana iti phonebook ti selponna, tinawaganna ti numero.

Nagtibbayo ti barukong ni Rudy idi nangegna ti kiriring manipud iti bangir a linia. No kasta, agpayso ti suspetsana nga adda ti selpon ni Papangna iti ikut ti kriminal!
Ngem nagtalinaed ti bangir a linia a sikiririring. Nangegna laengen ti boses nga agkunkuna: sori, the number you dialed can not be reached.

Inulit ni Rudy ti timmawag. Nagkiriring manen iti bangir a linia. Madamdama, nangegna ti naumbi a boses a nagkuna: Ikaw ba ito, Mark, honey?”

(Maituloyto)