Footer

Naing-inget pay a police operations kontra bunggoy ti NPA a nagtambang tropa ti gobierno: PNP regional director

CAMP BGEN OSCAR FLORENDO – Imbilin ni Region 1 Police Director Chief Supt. Roman A. Felix iti kapolisan ti Ilocos Sur ti panangiwayatda iti naing-inget pay a police operations kalpasan ti engkuentro iti nagbaetan ti tropa ti gobierno ken masuspetsa a miembro ti New People’s Army sadiay Sitio Kin Lourdes, Barangay Namitpit, Quirino, Ilocos Sur idi Pebrero 26 a nakatayan ti lima ken nakasugatan dagiti innem pay a soldado a kameng ti 81st Infantry Battalion, 7th ID ti Philippine Army.

Imbilin pay ni Felix iti kapolisan ti Ilocos Sur ken kabangibangna a provincial police forces ti panangiramanda iti Regional Public Safety Battalion 1 (RPSB1) iti panangiwayatda iti naing-inget a blocking forces ken papigsaenda pay dagiti operasionda iti lugar a responsibilidadda tapno matiliw dagiti nangisayangkat iti panagtambang kadagiti soldado.

Kas maibasar kadagiti report, naggapu ti komboy ti 81st IB, 7th ID, PA; Regional Public Safety Battalion 1(RPSBI); ken Ilocos Sur Provincial Public Safety Company (ISPPSC) iti Sitio Legleg, Quirino idi agarup 7:20 ti malem ti Pebrero 26 ket sumangsang-at ti luganda a KM250 iti Cervantes idi pinaputokan ida dagiti sumurok kumurang a 30 a miembro ti NPA a pakairamanan ti maysa nga Amasona.

Lima a kameng a kameng ti PA ti naireport a nagudas iti panagtambang a pakairamanan da CPL Elmer Lacandile y Castillejos, residente iti Zambales; CPL Jan-Jie Dela Cruz, residente iti Cabanatuan City, Nueva Ecija; PFC Charlynder Ramos, residente iti Tayabo San Jose City, Nueva Ecija; PFC Jumark Villanueva, residente iti Fort Magsaysay, Nueva Ecija; ken PFC Rene Gil Ocampo, residente iti Nueva Vizcaya; idinto nga 6 dagiti nasugatan a pakaibilangan da 2nd Lt. Jerome Yosoris y Bajao, residente iti Labangan, Zamboanga del Sur; PFC Jason Gongora y Gonsalez, residente Alicia, Isabela; PFC Alvin Mariñas y Almero, residente iti Sta.Rita, Cabangan, Zambales; PFC Danilo Pascua Jr y Cachola, residente Cayapa, Nueva Ecija; PFC Rolando Olipas y Catabona, residente iti Guimba, Nueva Ecija; ken PCF Lester King Ancheta, residente iti Aurora, Aurora.

Kameng amin dagiti natay ken nasugatan iti 81 IB 7ID PA a nakabase iti Barangay Bugbuga, Sta. Cruz, Ilocos Sur.

Immuna a naitaray dagiti nasugatan a soldado iti Quirino Primary Health Care Facility sada naiyalis iti RPSB Camp iti Poblacion, Quirino ken naipatulod babaen iti helicopter iti 811B Headquarters idi agarup 11:30 ti bigat ti sumuno nga aldaw.

Kabayatanna, nakarekobre ti SOCO team manipud iti Candon City iti maysa a bala manipud iti M14 ken 18 naiputok a cartridge cases manipud iti kapadana a kalibre, maysa a bala ti M16 ken 35 naiputok a cartridge cases iti nagpuestoan dagiti kabusor ti turay.

Maipalagip a sakbay daytoy nga insidente, idi Pebrero 19 daytoy a tawen, pinuoran dagiti masuspetsa a kameng ti NPA ti ekuipo ti minas ti South Ocean Mining Corporation sadiay Sitio Sinagaban, Patungcaleo, Quirino.

Idi Abril 11, 2014, pinuoran met dagiti mapapati a miembro ti NPA ti drilling machine ti Freeport Mc-Moran Phelps Dodge Mining Company sadiay Barangay Patiacan, Quirino.
Kinuna ni Felix a mangiwayatda iti agtultuloy ti koordinasionda iti Armed Forces of the Philippines tapno mamonitor dagiti agdakdakiwas nga insurgents partikular dagitoy nainbolbar iti nasao nga engkuentro.#

Comments are closed.