Footer

Swindling suspect, 10-tawen a natayen?

VIGAN CITY – Maymaysa a tao ti akinladawan iti dua a retrato iti rogues’ gallery nga ikut ti kapolisan a suspek iti kaso ti panangallilaw a nakabiktimaan ti maysa a taga-Nagsangalan ken taga-Caoayan itay nabiit?

Idi malem ti Pebrero 27, nagbalin a biktima iti panangallilaw a napasamak iti Jollibee a masarakan iti Barangay 1 ditoy siudad ni Gwendolyn Talingdan y Olayon, 32, naasawaan, ken residente iti Barangay Nagsangalan ditoy siudad a nakapukawanna iti balitok nga aritos nga agpateg iti P4,500.00, balitok a kuentas nga agbalor iti P12,000.00, balitok a singsing nga agbalor iti P4,500.00 ken P30,000.00 cash nga agdagup amin iti P51,000.00.

Nalimlimmuan ti biktima a nangited dagiti alahasna ken kuartana kas sukat dagiti alahas a mapapati nga agbalor amin iti P136,000.00 nga intanggaya ti suspek a mapanna isalda iti maysa a pawnshop ditoy Vigan.

Babaen dagiti retrato iti rogues’ gallery a naiparang kenkuana, intudo ni Talingdan ni Herminia Sinco a nangloko kenkuana.

Iti sabali a bangir, nagbalin met a biktima ti panangallilaw ni Alma Cadaoas y Querubin, 46, naasawaan, ken residente iti Barangay Don Dimas, Caoayan, Ilocos Sur idi malem ti Marso 2 a nakapukawan ti kuarta ken alahasna.

Segun iti report a nakalap manipud iti polis ditoy siudad, sumrek koma ni Cadaoas iti Smart Center a masarakan iti Plaza Maestro idi inasitgan ti maysa a Presila Sinco a nagpammarang a masikog ken di nabigbig a kaduana ket dinamagda no adda ammona nga agiregreg iti sikog.

Bayat ti panagpapatangda, indiaya ni Sinco nga ilako ken ni Cadaoas ti gold-plated a bracelet ken dua a gold-plated a singsingna iti nababa a presio.

Naallukoy ni Cadaoas ket kinuyog pay dagiti suspek a nagturong iti balay ti biktima tapno mangala iti pagbayadna.

Kalpasanna, nagturong da Cadaoas ken dagiti suspek iti McDonald restaurant ket sadiay nga inyawat ti biktima ti bayad dagiti alahas a mapattapatta nga agbalor iti P55,000.00.

Nagturong da Cadaoas ken dagiti suspek iti Plaza Burgos ket nakumbisi dagiti suspek ti biktima a nangited pay iti kuentasna nga agpateg iti P10,000.00 sakbay nga intedda kenkuana dagiti alahas.

Naduktalan ti biktima a peke dagiti alahas idi napanna pinaamiris dagitoy iti maysa a pawnshop.
Intudo ni Cadaoas ti retrato ni Presila Sinco iti rogues’ gallery nga isu ti nagpammarang a masikog a nangloko kenkuana.

Ngem impalgak ti barangay captain ti Pug-os, Cabugao a nabayagen a natay ti maitudtudo a suspek a nangitaray iti kuarta ken alahas ni Talingdan.

Kinuna ni Pug-os Barangay Captain Yangat a natayen ni Herminia Sinco, sangapulon a tawen ti napalabas, sadiay Cagayan.

Ngem kinuna ni Vigan City Chief of Police Supt. Jujith del Prado nga identical dagiti rupa iti retrato ket posible a maymaysa a tao ti akinretrato kadagitoy ngem naar-aramat ti nagan nga Herminia uray nabayagen a natay.

Segun ken ni del Prado, kinumpirma kenkuana ti COP ti Cabugao a sibibiag pay ni Presila Sinco ket sagpaminsan nga agawid iti Barangay Pug-os ken nagbutos pay daytoy iti napalabas nga eleksion.

Innayonna a nakikoordinardan iti kapolisan iti Cagayan tapno makumpirma no agpayso a natayen ni Herminia Sinco tapno manotaran iti babaen ti naganna a natayen.#

Comments are closed.