Footer

Komentario: Rumbeng kadi a pakawanen ni GMA?

Galad kadatayo a Filipino—nangruna ni Ilokano—ti nalaka a mamagpakawan kadagiti tao a makabasol kadatayo. Uray kasano kadagsen ti basol ti maysa a tao kadatayo no nagparintumeng iti sanguanan sana pinasarunuan ti umarubos a lulua ken nakaam-amo metten ti rupa, di mainsasaan a pakawanentayo ti basol daytoy.

Wen, adda dagiti saggaysa a natangken ti pusona, nga uray ngata aglua ti nakabasol kenkuana iti dara—a kas kunatayo—di mapakawan. Ngem manmano dagiti kasta a situasion. Ta naturalen kadatayo ti nalukneng ti pusona.

Ni sigud a Presidente Joseph Estrada, naibalud idiay Tanay idi nasentensiaan ti reclusion perpetua gapu iti kasona a panagkunniber. Ngem naaddaan iti pardon babaen iti presidential clemency ni sigud a Presidente Gloria Macapagal Arroyo iti panawen a panagtakemna. Nadagsen no ar-arigen ti kaso ni Joseph Estrada, nangruna ta iti dayta a panawen, kababangluan pay laeng ti nagan ni GMA iti sidong ti gobierno. Kadagita a panawen, iti imatang ti tattao, nangruna kadagiti opisiales ti gobierno nga adda iti aglawlaw ni Presidente Macapagal Arroyo, ni Erap ti pagparparangenda a kadadaksan a tao.

Ket iti dayta met laeng a panagtakem ni GMA, napalubosan ni Erap kalpasan ti innem a tawen a pannakaibaludna. Timmaray a Presidente manen ket dandanina inpanabtuob ni Presidente Aquino. Iti simmaruno a butos, timmaray kas Mayor idiay Manila ket inatiwna ni Alfredo Lim.

Dimteng ti panawen a panagbaliktad ti gasat ni GMA. Ti kababangluan idi a tao idi panawen ni Erap ti nagbalin a kababangsitan a nagpresidente iti panawen ni Presidente Aquino. Ti kunada idi a kasayaatan ken kalaingan a presidente ti Pilipinas idi panawen ni Erap ti nagbalin a kamadian idi panawen ni Presidente Benigno Simeon Aquino III. Nagtupak ti lubongna gapu iti Hello Garci wenno electoral sabotage, nagraira ti damag maipanggep iti panagkunniber.

Resulta, naibalud idiay Veterans Memorial Medical Center. Uray panagpaagasna koma idiay balasiw-taaw di napalubosan ket naatipa isuda idiay airport bayat a naka-wheelchair. Dagitoy a sakitna a nangpakaro iti pakasaritaanna ket ti cervical spondylosis.

Ti kasla langit a panagbiagna idiay Malakanyang bayat iti panagtakemna kas presidente ti nagbalin a kasla impierno kalpasan ti panagtakemna. Saan la isuna, uray dagiti kakadduana ti kinamat ti madi a gasat. Adda naibalud ken adda nagpakamatay, piman.

Ita, baketen ni Gloria Arroyo—ti sigud a presidente ti Republika. Ti napnuan karisma ken pusaksak a rupana gapu ngarud kano ta kaing-ingasna ni Nora Aunor ket nagpukawen. Awanen ti sigud a natinggaw a kudilna. Ita, kanayon nga adda tengngel ti tengngedna, nakuridemdem dagiti matana, nakakaem dagiti bibigna, nanglaylayen ti salun-atna.

Uray ‘toy numo ‘toy biang, maasian iti kasasaad ti sigud a presidente. Ti presidente a pirmi ti panangay-ayattayo kenkuana isu ngarud nga insaadtayo isuna kas numero a senador ti Pilipinas—insaadtayo a bise-presidente—ken inbotostayo a kas presidente. Namindua pay a daras a nag-presidente. Sitayo ti nangisaad kenkuana iti posision gapu iti nakitatayo kenkuana a liderato. Ken inay-ayattayo isuna.

Ita—agsaksakit—nakabalud.

Nayarungaing manipud iti administrasion Aquino ti pannakapawan koman ti sigud a presidente. Presidential clemency ni GMA nga inpaayna ken ni Erap. Isu ngata nga uray ni Erap, kasta la unay metten ti kalikagumna a maikkan metten iti respeto ken pannaripato ni GMA. Rumbeng metten a mapalubosan iti hospital arrestna ken mapan agpaagas iti kasayaatan nga ospital tapno agsubli ti sigud nga isem iti bibigna.

Adu ti mangikalkalikagum. Ngem siempre, ni Presidente Noynoy ti makasungbat iti daytoy nga arungaing. Ipaayna ngata ti pammakawan ken ni Arroyo wenno agbalin nga anniniwan laeng ti inana a ni Corazon Aquino nga awan ti pammakawan a nangegan kenkuana ken ni sigud a Presidente Ferdinand Marcos a napadisi babaen iti People Power.

Di maikkat a ni Gloria Arroyo ket nagbalin a presidente iti pagiliantayo. Naidarum ken naibalud. Ngem di met malipatan ti panawen a kasta la unay ti panagayattayo kenkuana. Ket agsakit ken baketen. Adu ti rason a makitak tapno maikkan koma iti importansia ken respeto. No tradision man ti panangibalud kadagiti presidente iti pagiliantayo; no daytoy ket maysa a lunod kadagiti agtugaw iti kangatuan a posision iti pagilian; napintas latta metten no masursurotayo ti mangawat iti situasion. Ta ne, madi metten ti pakasaritaan ti presidentetayo. Napatakias iti People Power ni Ferdinand Marcos; nakudeta nupay nakakapet iti tugawna ni Cory Aquino; naidarum ken nabalud ni Joseph Estrada; naidarum ken nabalud ni Gloria Macapagal Arroyo; saan koma metten a mapasamak daytoy ken ni Noynoy Aquino.

Ngem sa la ngata maputed daytoy a lunod idiay Malakanyang no rugiantayo ti nadalus nga administrasion. Awan ti pinnabasol; awan ti korupsion; awan ti Machiavellian a politiko; ken awan ti natangken ti pusona.

Uray ta galadtayo metten ti mannakaawat.#

Comments are closed.