Footer

26 mannalon, nagturpos iti Farmer Field School- Corn Production

CANDON CITY – Duapulo ket innem a mannalon ti nagturpos iti panagpaadu iti produksion ti mais iti simple a programa a naangay iti Candon City Hall ditoy idi Hunio 9.

Inawat dagiti mannalon nga agnaed amin iti Barangay Parioc 1st ti sertipikoda manipud kada Mayor Ericson Singson; Constante Botacion, OIC agriculturist ti probinsia ti Ilocos Sur; Cesar Escobar, regional corn coordinator; Oscar Tobia, provincial IPM coordinator; City Councilor David Wagayen ken dadduma pay a pannakabagi ti agrikultura.

Iti panagbitlana, kinuna ni Singson a mangilatlatang latta ti city hall iti pondo para iti pannakagatang dagiti farm equipment, inprastruktura, bin-i ken bukbukel kas suporta ti administrasionna kadagiti mannalon.

Tinawen nga ipapaay ti Candon City ti panagadal dagiti mannalon iti babaen ti FFS tapno mapaadu dagitoy ti produksionda, saan laeng iti mais no di pay iti pagay ken nateng. (Danilo Antalan)