Footer

1,373 panggedan, naitanggaya iti job fair

SAN FERNANDO CITY – Saan a nakurkurang ngem 1,370 a job openings ti naitanggaya para kadagiti agbirbirok iti pagtrabahuan iti La Union ken kaparangetna a probinsia bayat ti job fair a naangay ditoy itay nabiit.

Impalgak ti Department of Labor and Employment a saan a nakurkurang ngem 1,373 a panggedan ti naipaay kadagiti agbirbirok iti trabaho iti job fair a naangay iti Manna Mall, Barangay Biday ditoy kas panangselebrar ti probinsia iti Aldaw ti Wayawaya.

Intanggaya dagiti 13 a lokal nga employers dagiti pagtrabahuan a pakaibilangan dagiti mangisursuro, accountants, auditors, human resource managers, pharmacists, engineers, supervisors, ken dadduma pay.

Siam met a lisensiado a recruitment agencies ti nangitanggaya iti pagtrabahuan kas pipe fabricators ken fitters, electricians, welders, metal fabricators, cooks, therapists, ken dadduma pay para iti agbirbirok iti trabaho iti ballasiw-taaw.

Nangrugi ti job fair iti 8:00 iti bigat ken naggibus iti 4:00 iti malem.#