Footer

2 pawnshop, panggep a takawan ti Tunnel Gang

CANDON CITY – No saan a nagdalus iti sewer dagiti empleado ti city hall idi malem ti Hunio 2, posible a natakawan ti dua a pawnshop a masarakan iti Barangay San Isidro ditoy siudad.

Kas maibatay iti report, bayat ti panagdalus dagiti empleado ti city hall iti drainage canal iti Madarang Street idi malem ti Hunio 2, nadiskubreda dagiti tali a nakaparaut iti maysa a plastic box ket indanonda daytoy iti Candon Police Station.

Iti panagsukimat dagiti nagresponde a polis kadagiti manholes, nadiskubreda dagiti nadumaduma nga instrumento a pakaibilangan ti 50 ton hydraulic jack, 2 nga steel crowbars, steel saw, screw ken flashlight.

Suspetsa ti kapolisan a plano dagiti mannanakaw a mapapati a kameng iti Tunnel Gang a takawan ti Maria Gracia Pawnshop Incorporated ken Tambunting Pawnshop a masarakan iti Barangay San Isidro, Candon City agsipud ta adda dagitoy iti asideg iti nakasarakan dagiti instrumento a pagkali ken ragadi iti landok.

Kanaig daytoy, pinalukatan ti polis dagiti manhole iti central business district tapno masukimat ti nagnaan dagiti di ammo a suspek a mapapati a kameng iti sindikato nga agtaktakaw kadagiti pawnshops.

Modus operandi dagitoy a grupo ti iseserrekda kadagiti sewerage wenno drainage canal sada agkali iti tunnel nga agtungpal iti uneg ti nakaimuntaran ti vault ti pawnshop wenno bangko a kayatda a takawan.

Kitkitaen ti kapolisan no daytoy met la a grupo ti nagpanggep nga agtakaw iti Tambunting Pawnshop ken Asia United Bank, agpada a masarakan iti Quezon Avenue, Barangay 1, Vigan City.

Idi Marso 30, nadiskubre nga adda dagiti tunnel a nakali nga agturong kadagiti nasao a pawnshop ken bangko.

Nakadiskobre pay dagiti polis iti heavy duty hydraulic jack, cutter flier, 5” x 5” a kayo nga agatiddog iti 29 a pulgada ken 3 a steel a tubo a naaramat a pagtukol iti tunnel.

Mapapati a nakasaganan a matebbag ti batog ti lobby ti Tambunting Pawnshop babaen ti hydraulic jack ket iyur-uray laengen dagiti mannanakaw ti isasangbay ti napaut a bakasion, kas koma iti Semana Santa tapno isayangkatda ti panagtakaw.

Maipalagip nga idi Nobiembre 1, 2011, natakawan ti Tambunting Pawnshop ket masuspetsa a taga-Cordillera dagiti nangisayangkat iti panagtakaw.#