Footer

4 babbai, natiliwan agipuslit tagilako iti grocery store

STA. LUCIA, Ilocos Sur – Iti maikadua a gundaway, saan a nagballigi dagiti uppat a babai nga agipuslit iti tagilako iti maysa a pagtagilakuan ditoy nga ili agsipud ta nailasin ida dagiti empleado ti grocery store.

Nabigbig dagiti suspek a da Annabel Bulatao y Andasan, 33, naasawaan; Maricel Bautista y Manzon, 36, naasawaan; Analyn Bulatao y Cruz, 42, naasawaan; ken Marivic Eugenio y Manzon, 42, awanan asawa, residenteda amin iti Brgy. Bacnar, San Carlos, Pangasinan.

Napilaan dagiti suspek iti panagsalungasing iti Article 308 (theft) iti Revised Penal Code ket aipila ti kaso iti provincial prosecutor’s office, Candon City.

Segun ken ni Perlita Habon, manadier ti Golden E-Mart, immuna a tinakawan dagiti uppat a babbai ti nasao a pagtagilakuan idi malem ti Hunio 2, 2015 kas maibatay iti Closed Circuit Television footage.

Tallo a boxes ti assorted a sigarilio ti impuslit dagiti uppat iti grocery mart nga agbalor amin iti P75,000.00.

Saan a nasiputan dagiti empleada ti pannakaipuslit dagiti tagilako ngem nairekord iti CCTV.

Iti panagimbestiga dagiti polis, idi agarup 6:20 ti malem ti Hunio 3, simrek manen dagiti suspek iti pagtagilakuan ngem nailasin dagiti empleado ket imbilin ni Habon ti pannakaiserra ti sarming a ridaw ti pagtagilakuan ken iti pannakasiim dagiti suspek.

Kalpasan a pinanggep ni Eugenio nga ipuslit ti maysa a box ti sigarilio, ginammatan idan dagiti empleado.#

Comments are closed.