Footer

9 kameng ti CNN, nakasuan gapu panangrautda kampo ti PA

STA. CRUZ, Ilocos Sur – Siam a mapapati a kameng ti lokal a terorista a komunista ti napilaan iti kaso a frustrated ken attempted murder iti opisina ti provincial prosecutor iti Vigan City gapu iti pannakaraut ti kampo ti Philippine Army sadiay Barangay Bugbuga ditoy nga ili idi Nobiembre 10, 2014 ken nakasugatan iti tallo a soldado.

Kalpasan a napaneknekan nga adda probable cause, naipila ti impormasion ti frustrated murder ken attempted murder maikontra kadagiti mapapati a kameng ti CNN a pakaibilangan da Crisaldo Bangsil, Rowena Antalan, Ronnie Dalem Garvida, Raul Bangsil, Francis “Jun” Bonuan, Alpha Sunggay, Johnny Obena, Evaristo Bouquing and Avelino Cruz y Alcaraz.

Nai-docket ti kaso iti babaen ti Criminal Case Nos. 3492-C agingga iti 3496-C a napetsaan Abril 29, 2015.

Maipalagip nga idi rabii ti Nobiembre 10 itay napan a tawen, rinaut dagiti mapapati a kameng ti CNN ti detachment ti PA a nakasugatan dagiti tallo a soldado a pakaibilangan da Pvt Rey Bajar y Trinidad, Pvt Sam Garote y Baybaya, ken Pvt Jaceth Baluyan y Catalog.

Nagpaut ti ranget iti sumurok kumurang 30 minutos ngem dagiti rimmaut a nangrubbuot iti kampo ket naglibasda idi agarup 8:45 iti dayta met laeng a rabii.

Kabayatanna, dua pay a mapapati a kameng ti CNN ti naiyendorso a mapilaan iti multiple frustrated murder gapu iti panagpabettakda iti eksplosibo idi Abril 16, 2015 sadiay Barangay Bacsayan, Sta. Cruz, Ilocos Sur a nakasugatan iti tallo a soldado ti gobierno.

Nasugatan iti panagpabettak da MSgt. Narciso Aromin y Gapuz, 48, TSgt. Carlos Luna y Tumbali, 47, PFC Jerwin Alvarez y Garcia, miembroda amin iti Philippine Army 81st Infantry Batallion 7th Infantry Division a nakabase iti Brgy. Bugbuga, Sta. Cruz, Ilocos Sur.

Naiyendorso a mapilaan iti multiple frustrated murder da Raul Bangsil, @ “Ka Jack/Ponce”, iti Brgy. Babayuan, Sta. Cruz ken Avelino Cruz y Alcaraz, @ “Ka Junel” iti Brgy. Lubong, Sta. Lucia, Ilocos Sur.

Iti inisial a panagimbestiga dagiti polis-Sta. Cruz, idi agarup 6:00 ti malem ti Abril 15, agdaldaliasat ti KM 250 truck a nagluganan ti tropa ti gobierno iti barangay road ket idi makadanonda iti Barangay Bacsayan, kellaat a bimtak ti eksplosibo a naimuntar ken naibitin iti kawkawati ken ipil-ipil. Kas resulta, nagsagrap dagiti biktima kadagiti dunor iti nadumaduma a paset ti bagida a pinataud dagiti iron cast nails.#