Footer

Manedier iti panganan, nahold-ap

VIGAN CITY – Ballaag kadagiti motorista a naladaw nga agaw-awid: dikayo agtaltalek nga agdaliasat iti nasipnget ken di matatao a dalan ta amangan no adda agpadpadaan a hold-aper a mangbiktima kadakayo.

Leksion daytoy ni Mark Adame y Redondo, 24, baro, caterer/manager ti Uno Grill, ken residente iti Barangay Beddeng Laud, Vigan City a nagbalin a biktima iti panaghold-ap idi parbangon ti Hunio 1 sadiay Rivero Street, Barangay 9, Vigan City, partikular iti dalan a lumasat iti rangtay sakbay ti Barangay Beddeng Laud.

Segun iti report, bayat ti panagdaliasat ti Motor Star a minaneho ni Adame iti Rivero Street sakbay ti rangtay iti Barangay Beddeng Laud, kellaat a nagparang ti nagtagiarmas a lalaki a nagaruat iti nangisit a tisirt ken long pants ken nakakallugong iti bull cap sana insenias ti panagsardeng ni Adame.

Kalpasan nga impaigid ni Adame ti motorsiklona, impan ti lalaki iti saan a nasilawan a paset ti rough road iti teppang ti Mestizo River ket sadiay, innala ti kadua daytoy ti selponna a Samsung Galaxy nga agbalor iti P5,500.00, silver necklace nga agbalor iti P1,000.00 ken P200.00 a kuartana.

Kalpasanna, pinaglabus dagiti hold-aper ni Adame sada pinungo daytoy ken intaray ti motorsiklona.
Nabaelan ni Adame a winarwar dagiti galut iti imana ket nagtaray a naggawid sa nagpaarayat.

Apaman a naawatda ti pulong, dagus a nagresponde dagiti polis ket nangiwayatda iti hot pursuit operation kontra kadagiti suspek ngem saandan a nasapulan dagitoy.

Nangipatulod dagiti polis iti flash alarm kadagiti kaparangetna a police stations ngem negatibo ti resultana.
Iti pannakaisurat daytoy, di pay nabigbig ti kinaasino dagiti nanghold-ap ken ni Adame.#

Comments are closed.