Footer

3-aldaw operasion: P1-M balor ti mula a marihuana, napag-ot, napuoran

LA UNION – Nasurok a maysa a milion ti balor dagiti mula a marihuana a pinag-ut ken pinuoran dagiti kapolisan iti tallo nga aldaw nga operasion nga insayangkatda iti pagbeddengan ti Ilocos Sur, Benguet ken daytoy a probinsia.

Manipud idi agsapa ti Hunio 6 agingga iti aldaw ti Hunio 8, agdagup iti 4,600 a kapuon ti fully grown a marihuana ken 2,100 seedlings a naimula iti lima a plantasion ti pinag-ut ken pinuoran dagiti nagtitipon nga elemento ti kapolisan a pakaibilangan ti LUPPSC, San Gabriel Police Station ken Kibungan Police Station nga indauluan ni Police Senior Inspector Olarte D. Kayob, OIC.

Masarakan ti plantasion iti nagbeddengan ti Sugpon, Ilocos Sur, Kibungan, Benguet, Santol ken San Gabriel ditoy a probinsia.

Mapattapatta nga agbalor dagiti napag-ut ken napuoran a kapuon ti marihuana iti P920,000.00 idinto a mapattapatta nga agbalor amin iti P84,000.00 dagiti seedlings a dinadael dagiti operatiba.

Mapattapatta nga aglawa ti lima kadisso a nakaimulaan dagiti puon ti marihuana iti 1,222 metro kuadrado.

Kalpasan ti panangpag-ut ken panangpuor dagiti polis dagiti mula a marihuana, nangisalogda iti sumagmamano a kabungkos para iti umisu a disposision.#