Footer

Afternoon Fever

Sinursuran: Kolum ni Jobert M. Pacnis
(Maudi iti dua a paset)

Kaniak a biang, kasano nga ammo dagiti ordinario nga umili no emergency wenno out- patient laeng ti pasienteda. Kas iti kasomi, agalas kuatro idin ag-vomit ti ubingmi. Gapu ta agbara payen, kapilitan nga intaraymi a dagus (ulitek, dagus dayta) iti ospital. Agalas singko idin makagtengkami. Di kad’ nalpasen ti regular a panagtsek-ap ti doktor. Isu a maawatanmi no awan a dagus ti nangasikaso a mangngagas kadakami. Nalabit a kadagidi a panawen, kaserserrekna iti naisangrat a kuartona tapno aginana. Dagiti met nurse, addada laeng iti puestoda iti uneg a makumikom kadagiti assignment-da.

Maysa pay, mayiskediulmo kadi ti agsakit? Ospital ti gobierno dayta, kayatna a sawen, agnanayon ti panagawatda iti pasiente; agnanayon a silulukat ti ruangan ti ospital para kadagiti pasiente. Akemda nga ited ti pannaranay kadagiti agkasapulan, ‘tay awan pilpilienda nga awaten— iti ania man nga oras ken aldaw.

Idi ti nurse dayta nga afternoon fever, uray la agmalmalanga dagiti kaduami a nagannak. Ania ngata daydiay? nalabit nagay-ayam iti panunotda.

Nagsardeng, ngem nakamisuot, ti nasao a nurse idi nagsaoak. Siguro, dina namnamaen nga adda sumungbat kenkuana, wenno kadakuada, ta madlaw a nagkikinnissiim pati dagiti kakaduana.

Pagyamanan ketdi ta nupay kasta, tsinek-ap latta ti nakaiskediul a doktor dagiti ubbingmi idi addan daytoy. Ngem awan a pulos ti iisemanna.

Ti yanna nga adat idi mairesetaan ti ubingko, awan ‘tay agas a maitudok kenkuana. Dagiti laeng antibiotics ken para gurigor ti nagatangko iti drug store, a kooperatiba dagiti empleado, iti ikub ti paraangan ti ospital. Imbagak iti doktor daytoy tapno saan nga agur-uray ta binagaannakon ti para lako a mapanak laengen gumatang idiay sentro.

Ngem kuna ti doktor a saanen. Mangibagaak lattan iti Pharmacy iti sango laeng ti pagtsek-apanda. Kasta ngarud ti inaramidko. Maysa a gagangay nga empleado ken nurse ti nadanonko ditoy. Impakitak ti reseta ti doktor nga awan a nagatangko iti drug store.

“Idiayka drug store a gumatang kadayta, sir,” kinuna ti maysa kadakuada.

“Naggapuakon idiay, mam,” insungbatko, “ngem awan lakoda.”

“Adda, sir,” impilitna.

“Awan, mam,” medio nasemsemak ta saandak metten a patien. “Ginetteng ngarud ‘diay adda iti drug store ‘tay sibubukel a reseta, mam, isu a sangkapirgis laeng dayta,” intudok ti inyawatko kadakuada a persat ti reseta.

Nagkinnitada. Idi kuan, ipilitda manen nga adda idiay drug store a naggapuak. Impilitko met nga awan. K
“Out-patient kadi ‘diay pasienteyo, sir?” sinaludsodda.

“Wen, mam.”

“”Saan ngarud a mabalin, sir,” kinunada ketdin.

“Imbaonnak met ni doktor, mam,” agngarngarieten ti unegko.

“Inka man damagen ‘diay coop,” idi kuan ta kinuna ti nurse iti kaduana, “no talaga nga awan.”

Anak ti agballa nga aso! Agsalsalawasawak pay iti panagkunada? Saandak a kayat nga ikkan iti libre nga agas?

Libre ti agas nga agtaud iti Pharmacy ti ospital. Naisangrat daytoy kadagiti nanumo a pasiente wenno dagiti makurkurangan.

Ditan a nagkibuar ti unegko. “Pagbalbalinendak pay a salawasaw! Imbagak la ngaruden nga awan iti drug store ken imbaonnak ti doktor,” kinunak ken ni baket iti sanguanan dagiti dadduma pay a nurse idi nagsubliak iti yanna pangur-urayak ti napan nagdamag iti drug store.

Nagkikinnita manen dagiti nurse. Nalabit, adda met sangi daytoy, kunkunada iti unegda.

Simmangpet ti napan iti drug store. “Awan,” kinunana iti nangbaon kenkuana a nurse.

Mamatikayon, mam? kunak koma ngem nagparbengakon. Pinagpirmadak iti logbook sakbay nga intedda ti masapul ti ubingko a maitudok kenkuana nga agas.

Panagtalek, dayta koma ti adda kadakuada. Ken kitaenda koma met no asino ti pagsalsalawasawenda. Ken apay a kasla yimutda dagiti agas ket maysaak met nga umili nga agbaybayad iti buis— regular pay!

Ngem no dagiti dadduma, uray pay adda mabalinna, ken am-ammoda, pagdiretsuenda nga agala iti agas iti Pharmacy. Ngem kuidawka no didaka am-ammo. Pagdiretsuendaka la ketdi, kas kadakami, iti kooperatibada.

Padapada laeng ida nga agtrabtrabaho iti gobierno. Ipaayda koma ti panagpapatas kadagiti pasienteda. Ken ikkatendan dayta pagsasaoda nga afternoon fever. Ta ulitek, saan a mayiskediul ti sagubanit. Ken akemda a tamingen dagiti maikumit kadakuada a pasiente. Saan a dayta kasla pagsasadutanda nga asikasuen.#

Comments are closed.