Footer

BANNER: Nabartek a polis, kinarit, binassawanganna ti hepena

SANTIAGO, Ilocos Sur – Ti delinquency report maikontra iti maysa a polis ti mapapati a ramut ti nagginoman daytoy a nagtungpal iti panangkaritna ken panangbassawangna iti hepena idi malem ti Hunio 10.

Kanaig daytoy, imbilin ti Provincial Police Office ti panagreport pay laeng ni Police Officer 2 Edward Pescador Ramolete iti Sta. Catalina Police Station tapno malapdan ti aniaman a riribuk iti nagbaetanda ken ni Police Inspector Roderick Abenojar Vintero, hepe ti polis ditoy nga ili.

Naibaon met nga agreport iti Bantay Police Station da PO3 Dennis Tollio Pascua ken PO1 Marlon Molina Morales, dagiti dua a polis a kinainninom ni Ramolete bayat ti kaaddada iti duty idi aldaw ti Hunio 10.

Segun iti report manipud iti police station ditoy, ti pannakailista ni Police Officer 2 Edward Pescador Ramolete a managlangan, partikular idi Hunio 3, 2015 ti mapapati a nakagapu iti panagginom ti polis ken dina panangrespeto iti hepena.

Iti alas otso iti dayta a petsa, nangangay ni Police Inspector Roderick Abenojar Vintero, hepe ti polis, iti emergency meeting mainaig iti panaglangan ni Ramolete sana impalawag a sumurot koma amin a personnel iti polisia ken pagannurotan iti nangatngato nga opisina mainaig iti pagrebbenganda.

Mapapati a timmakder ni Ramolete ket arogante iti panagpalawagna isu a pinuted ni Vintero ti miting tapno malapdan ti nabara nga argumento.

Naammuan ti Tawid News nga idi agarup 12:12 ti malem ti nadakamat a petsa, naduktalan ni Vintero dagiti tallo nga agiinom iti arak iti kusina ti police station nga adda laeng iti asideg ti tiendaan publiko ket binagaanna ida nga isardengda ti aginom ngem saan nga intaltalek dagiti tallo a polis.

Mapapati nga inulit ni Vintero a binagaan dagiti tallo nga isardengda ti aggiinom ta makitkita ida dagiti tattao manipud iti tiendaan publiko ngem mapapati nga insungbat ni Ramolete a “Sayang daytoy arak, sir, ginatangko daytoy”.

Agsipud ta saan latta nga intaltalek dagiti polisna ken awan ti t-shirt ni Ramolete ken nakasabbikel iti paltog iti siketna, dinis-arma ni Vintero ni Ramolete.

Mapapati a sinurot ni Ramolete ti hepena tapno isubli daytoy ti paltogna ngem di pinatgan ni Vintero agsipud ta nabartek daytoyen ken nagubsangen ti tignayna.

Binagaan met ni SPO2 Cornelio Ladines Coloma ni Ramolete a pumanaw pay laeng iti police station sadanto agpatang iti hepe no nagkalman ngem nagbassawang ketdi daytoy.

Mapapati a kinugtaran ni Pascua ti monobloc chair iti uneg ti police station. Maipagarup a ginammatanna pay ni SPO2 Coloma ngem pinagtalna dagiti sabali a polis sada kinumpiskar ti paltogna.

Kalpasan ti sumagmamano a minutos, nagsubli ni Ramolete iti estasion ngem mapapati nga adda kutsilio nga insalikadna iti siketna ket kinumpiska ni PO2 Palamo.

Kinumpronta manen ni Ramolete ni Vintero ket tinengngel ti hepe sana impisok iti pagbaludan babaen iti tulong ti dua a polisna.

Kabayatan a nakadetener ni Ramolete iti pagbaludan, mapapati a binallaaganna da Vintero, Beronilla, Coloma ken Palamo iti “Patayen kayo amin/ anupen kayo amin inton makaruarak, daytoy pinagramas ko ti rehas, adda sukat na a biag, ken uray nu maikkatak a pulis basta adda matay.”#