Footer

EDITORIAL: Ikakapet iti Patadem

Kadagiti adda iti ngarab ti derraas, kapilitan a kumpetda iti aniaman a maiggamanda, uray pay patadem tapno saanda a makaruskos wenno matinnag, Mapaspasamak daytoy kadagiti umili kadagiti nariribuk a pagilian a maip-ipit iti nagbaetan dagiti agduduma nga aggugubat a puersa.

Yan ti nakaladladingit, uray dagiti naibaon nga umarayat tapno mapagtalinaed ti urnos ken talna kadagitoy a pagilian ket isuda pay met ngarud ti maysa kadagiti mangirarem kadagiti daksanggasat a mangitangtanggaya kadagiti imada tapno maalawda iti ingget pigsa nga agos ti pannakaungaw. Nalukaisan daytoy iti maysa a report manipud iti Office of Internal Oversight Services a naiparuar itay nabiit.

Kas nailanad iti report, dagiti soldado a naibaon a peacekeepers kadagiti nariribuk a pagilian nga aggugubat dagiti di agkatunosan a puersa gapu iti ideolohia, politika wenno espiritual a kagagapu, ket kasla awan aniaman a gumatangda iti serbisio iti sex kas kasukat iti alahas, sapatos, telebision wenno ania ditan a pagjkakuartaan manipud kadagiti ubbing ken tinedier nga agtawen iti nababbaba ngem 18.

Iti interbio a naisayangkat sadiay Haiti, inannugot ti 231 nga ubbing a babbai ken tinedier ti nakikanaig kadagiti personnel ti United Nations kas kasukat iti alahas, sapatos, aruaten, panty, bangbanglo, selpon, radio, telebision, ken uray laptop.

Iti sabali a surbey iti 489 a babbai nga agtawen iti 18 agingga iti 30 sadiay Liberia, nakikanaig iti maysa a kuarto dagiti babbai nga agnanaed iti siudad kadagiti peacekkeepers iti UN tapno adda laeng maiggamanda a kuarta nga igatangda iti kasapulanda iti biag.

Mapattapatta a dakdakkel pay ti bilang dagiti babbai a mangilaklako iti bagida kadagiti UN peacekeepers, kas iti Republic of Congo, Liberia, Haiti, Sudan ken South Sudan tapno laeng agbiagda.

Ngem ibagbaga ti United Nations a bimmaba dagiti kaso ti panagbuso a seksual manipud iti 127 idi 2007 iti laengen 51 idi napan a tawen agsipud ta ipakpakatda ti zero-tolerance policy kadagiti madi nga aramid a seksual ket nainget nga iparparitna kadagiti amin a personnel iti iseserrekda iti seksual a relasion kadagiti tattao a tulonganda.

Yan ti rigatna, yan ti pagbeddengan iti nagbaetan ti mabayadan a seksual a relasion ken iti naimpusuan nga itutulong tapno makalung-aw dagitoy iti pannakairarem?

Akuen man wenno saan ti UN, bimmassit ti bilang dagiti umili, nangruna dagiti babbai ti maab-abuso a seksual agsipud ta nababbaba nga amang ti mairepreport manipud iti daytoy nga ahensia.#

Comments are closed.