Footer

Menor de edad, naaramat a courier iti panaglako iti illegal a droga

CANDON CITY – Nasiksikapen dagiti aglaklako iti droga ditoy probinsia ta ar-aramatendan ti menor de edad iti transaksion iti daytoy illegal nga aktibidad.

Limtuad daytoy kalpasan a napalab-ogan ti lima a masuspetsa a drug pushers a pakaibilangan ti maysa a menor de edad babaen iti buy bust operations a nagsasaruno nga insayangkat ti kapolisan iti dua nga ili ken ditoy siudad idi Hunio 10.

Maysa nga agnagan Augusto Dario y Villalobos, 35, baro, ken residente iti Barangay San Isidro, Candon, maibilang a top ten illegal drug personality, ti inaresto dagiti polis-Candon babaen iti insayangkatda a buy bust operation sadiay Barangay San Nicolas idi agarup 9:05 ti rabii ti Hunio 10.

Nakumpiska iti ikut ni Dario ti maysa a heat sealed plastic sachet a nagkarga iti masuspetsa a shabu, dua a disposable lighter, dua a selpon, lima a sag-P50.00, ken 3 a sag-P500.00 a naaramat a buy bust money.

Kadua ni Dario a natiliw ni Dante (parbo a nagan ta menor de edad) 14, Grade VI pupil iti maysa a pagadalan elementaria iti Candon City ken mapapati a courier ni Dario iti illegal a droga.

Nakumpiska iti ikut ti menor de edad ti maysa a heat sealed plastic sachet a naglaon iti mapapati a shabu.

Iti sabali a damag, idi agarup 7:00 ti rabii ti Hunio 10, nangiwayat iti buy bust operation ti Tagudin Police Station sadiay Barangay Caboaroan a nagresulta iti pannakaaresto ni Archimedes Andaya y Bautista, 34, naasawaan, mannalon, ken residente iti Barangay Ambalayat, Tagudin.

Apaman a nakagatang ti nagpammarang a poseur-buyer iti maysa a heat sealed plastic sachet a nagkarga iti mapapati a shabu, inaresto a dagus dagiti operatiba ni Andaya.

Nakakumpiska pay dagiti polis iti sabali a heat sealed plastic sachet a mapapati a naglaon iti shabu iti makannawan a bulsa ti maong a pantalon ni Andaya, malaksid laeng iti P500.00 a marked money, disposable lighter, ken ti Racal motorcycle a mapapati nga inusar a lugan ti suspek bayat iti pannakitransakna iti lakona.

Kabayatanna, lima a heat sealed plastic sachet a nagkarga iti mapapati a droga ti nakumpiska dagiti polis babaen ti insayangkatda a buy bust operation maikontra kada Jaime Lopez y Espiritu, 31, baro, ken ni Felomino Lanuza y Jadormeo, 33, baro, agpada a residente iti Barangay Bimanga, Tagudin, Ilocos Sur.

Nakakumpiska pay dagiti polis iti dua a sag-P1,000.00 a nausar a marked money iti ikut dagiti suspek.
Naipan dagiti suspek agraman dagiti nakumpiska kadakuada iti police station para iti umisu a disposision.#

Comments are closed.