Footer

Suspek iti pammaltog, nagandat ti biagna

VIGAN CITY – Dua nga anggulo ti kitkitaen dagiti polis iti pannakapaltog ti maysa a Muslim sadiay Barangay Nagsangalan ditoy nga ili idi rabii ti Hunio 7.

Maysa nga anggulo a kitkitaen dagiti inbestigador ti mapapati a pannakainbolbar ti biktima iti pannakapaltog ti maysa a kadaraanda iti uneg ti Muslim compound iti Zone 3, Bantay, Ilocos Sur idi Mayo 24, 2015.

Sabali pay nga anggulo ti mapapati a pannakainbolbar ti biktima iti illegal drug trade.

Pinaltogan dagiti armado a lalaki a nakalugan iti van ken nakasakay iti motorsiklo ni Mohaimen Olay y Ali aka Alex Olay y Bandrang, 32, awanan asawa ken residente iti Muslim Compound, Zone 3, Bantay, bayat nga agdaldaliasat ti kotsena a Honda City iti panipngeten a paset ti kalsada a sakup ti Barangay Nagsangalan, Vigan idi agarup 8:00 ti rabii ti nadakamat a petsa.

Nagsagrap ni Olay iti sugat iti makannigid a paset ti bagina, makannigid a takiagna, makannawan a sakana ken tianna.

Nasap-igan met ti likud ni Joanne Perez, 25, kalib-in ni Olay, idinto a nasugatan ti makannigid nga ima ni Emerson Perez, 4, anak ni Joanne.

Segun ken ni Olay, naggapuda iti Zone 3, Bantay ket idi makadanonda iti Barangay San Julian Sur, napaliiwna a maysa a puraw a van ken motorsiklo ti nangsursurot iti luganna.

Iti panagimbestiga ti PCLO a nakabase iti Bulag, Bantay, ken ti Keen Investigation Monitoring Action Team (Kimat), nakarekobreda iti walo a naiputok a kapsula ti cal. 45 ken dua nga slug ti mapapati a cal. 45.

Nakaduktal pay dagiti inbestigador iti homemade cal. 38 revolver Colt Cobra ken maysa a bala a naikarga iti cylinder, 5 a bala ti cal. 38 ken maysa a bullet proof vest.

Maysa pay a bala manipud iti cal. 45 ti mapapati a narekobre ni Van Jacob R. Rafal, security aide, iti pantalon ni Olay iti Gabriela Silang General Hospital; sabali laeng ti maysa nga slug ti cal. 45 iti owner type jeep ti biktima.

Naipaima amin dagiti kapsula ken buli ken ni SPO4 Gilberto A. Tolosa, inbestigador ti Vigan City police station.

Maipalagip a ni Olay ti kangrunaan a suspek iti maysa a shooting incident sadiay Muslim Compound, Zone 3, Bantay ket nayendorson ti kaso a murder maikontra kenkuana.#

Comments are closed.