Footer

Babai a nagtakaw, natiliw iti tsekpoint

MAGSINGAL, Ilocos Sur – Babaen ti napardas a komunikasion, natiliw ti maysa a babai a nangsikuat iti naglakuan iti gas sadiay Barangay San Vicente ditoy nga ili idi malem ti Hunio 18.

Natiliw iti checkpoint nga impasdek dagiti polis-San Juan iti Barangay Bannuar ni Melanie Santos y Corpuz, 43, awanan asawa, ken residente iti Barangay 7, Sta. Cruz, Badoc, Ilocos Norte.

Sinikuat ni Santos ti P10,000.00 a naglakuan ni Chrisma Joy Ufina y Ullero, 25, awanan asawa, sales clerk iti Fiesta Gas Store – RKT Company, sa limmugan iti minibus nga agpaamianan.

Sakbayna, pinanawan biit ni Ufina ti pagtagilakuan ket idi agsubli, nakitana ti suspek nga agdardaras a rimmuar iti pagtagilakuan. Idi kitaen ni Ufina ti kuarta iti drawer, awanen isu a nagpaarayat iti padana nga aglaklako ket kinamatda ni Santos ngem nakalibas daytoy babaen ti panagluganna iti GLCC Mini Bus nga agpaamianan.

Apaman a naawatda ti report, dagus a nangiwayat ti polis-Magsingal iti hot pursuit operation ken pinakaammuanda ti San Juan Police Station para iti pannakasaed ti bus a nagluganan ti suspek.

Nangipasdek dagiti polis-San Juan iti checkpoint iti Barangay Bannuar sada pinara ti minibus. Inarestoda ti suspek kalpasan a nasukalanda iti ikutna ti kuarta a kinurimesna iti pagtagilakuan.#

Comments are closed.