Footer

EDITORIAL: Tapno madagdagus maited ti hustisia kadagiti naikuspil ti kalinteganda

Dakkel ti maitulong ti pannakabuangay dagiti kabarbaro a sanga ti korte iti nadardaras a pannakarisut dagiti nakapempen a kaskaso. Daytoy no lumsot ti proposal a pannakaipasdek dagiti kanayonan a sanga iti umuna ken maikadua a level dagiti nadumaduma a hudisial a korte iti sapasap a pagilian tapno makissayan dagiti kaso a saan a maresresolbar gapu iti pannakaimpempenda.

No mapatuloy daytoy a proposal, maparnuay ti dua a regional trial court branches iti Vigan City ken Sto. Domingo, Ilocos Sur; 4 RTC branches iti Alaminos City, Dagupan City, San Carlos City, ken Lingayen iti Pangasinan; 2 RTC ken 2 MTC branches iti Baguio City; 19 nga RTC branches iti Quezon City; 5 RTC ken 5 MTC branches iti Pasay City; 2 RTC branches iti Parañaque City; ken RTC ken MTC branches kadagiti nadumaduma a judicial courts iti intero a pagilian.

Agkurkurang dagiti korte iti pagilian nga ad-adda pay a pakaruen iti panagretiro dagiti hues. Ditoy laengen Ilocos Sur, sumagmamano a trial courts ti arig matmaturog dagiti nakapempen a kaso a kasapulanen a maresolbar gapu iti panagretiro ken pannakaiyalis dagiti hues iti sabali a rehion.

Iti sabali a paset iti pagilian, masansan a makabasatayo iti damag a kaadda dagiti malunglungsot iti pagbaludan gapu ta no ar-arigen, nakapempen ti kasoda iti korte ket agbubuoten iti kabayagda a maresolbar.

Mamatikami iti imbalikas ni Senator Aquilino Pimentel III a maysa daytoy a pangpabileg iti sistema ti hustisia iti pagilian.

Agpayso, rumbeng a maited kadagiti adda kasoda a kailiantayo ti kalinteganda a maipaayan iti madagdagus a hustisia ket panaglabsing daytoy iti kalinteganda no maitantan a maited kadakuada ti hustisia gapu iti pannakaitantan iti disposision ti kasoda.

Kas kapaliiwan, iti adu a paset ti pagilian, ingget puskol dagiti nakapempen a kaso nangruna kadagiti municipal trial courts ken regional trial courts gapu ta saan a magebgeban dagiti hues a resolbaren a sigida dagitoy. Resulta: mataktak ti pannakaited ti hustisia kadagiti akusado, nangruna dagiti awan ti basolda a nagbalin laeng a biktima iti panagibales ken panangikuspil gapu laeng iti risiris iti politika ken ideolohia. Adu dagiti makunkuna a political prisoners ken kakailiantayo a nakabalud gapu iti pammatida, ngem mabungbungsot iti pagbaludan gapu ta nakapempen ti kasoda.

Adda ngarud ita iti dakulap dagiti agilinlintegtayo ti nadaras a pannakaaprobar daytoy a gakat para iti pannakatunton ken pannagkagun-od iti hustisia, nangruna dagiti maikuskuspil a kailiantayo.

Kas kuna ti maysa a court official: “Iti sosiedad a mangtangtangad iti hudisaria a kas maudi a sanggir iti konstitusional a kalintegan ken wayawaya, imperatibo nga itedtayo ti inprastruktura a manggarantia a magun-od dagiti umili ti hustisia babaen iti napardas ken nasayud a wagas.#