Footer

Ikkis iti Kasipngetan

Sarita ni Arnold Reyes
Maika-22 a Paset

Tallon a tasa ti nakape da Rudy ken Hepe de la Cuadra. Naibbus metten ti sangasupot a pan de sal a pinagatang ni Hepe de la Cuadra ken ni SPO2 Andrada iti panaderia.

Kinita ni Rudy ti oras iti pungupunguanna. Alas 6:00 iti agsapa. Iti ruar ti police station, mangrugin a lumawag. Iti pattapattana, dandani itan a sumangpet ti yur-urayda.

Naggiddan da Rudy ken Hepe de la Cuadra a nagtengngaag idi adda nagbanurbor a
Immanges iti nauneg ni Rudy idinto a nakapagket ti matana ken ni Andy nga umun-uneg itan iti police station. Ita la a madlawna nga adu ti limmakayan ni Andy.

“Bay-annak a siak ti agsaludsod,” kinuna ni Hepe de la Cuadra. “Trabahomin a polis daytoy.”

Nagtung-ed ni Rudy.

Nailukat ti ridaw. Nagsarugaddeng ni Andy idi makitana ni Rudy iti uneg ti opisina ti hepe.

“Pinaayabannak met, hepe,” kinuna ni Andy kalpasan a kinablaawanna ni Rudy. “Apay kadi?”

“Agtugawka,” intudo ni Hepe de la Cuadra ti tugaw iti sangona.

Nagtugaw ni Andy. Nagpaiyuneg manen ni Hepe de la Cuadra iti kape.

“Pinaayabanka ta adda pay kayatko a malawlawagan mainaig iti pannakapapatay daydi Manong Mario ken Manang Lucrecia idi parbangon ti Hulio 8,” kinuna ni Hepe de la Cuadra.

“Awanen ti ammok a mainayonko iti daydi palawagko, Hepe,” nakuna ni Andy.

“Subliantayo dagiti pasamak iti daydi a parbangon,” kinuna ketdi ni Hepe de la Cuadra. “Segun iti palawagmo iti polis, nadadaelan ti luganyo idi agpailikayo, iti sakup ti Barangay Camantirisan, ket nagsublika iti purokyo a mangala iti rimienta a pangsukat iti pilid.”

“Agpayso dayta, Hepe. Ngem idi agsubliak iti yan ti nadadael a dyip, nadatngak laengen a nabagbagsol da Tata Mario ken Nana Lucrecia ken narames ni Liza.”

Nagkinnita da Rudy ken ni Hepe de la Cuadra. Nagliad ti hepe iti tugawna sana tinung-edan iti apagapaman ni SPO2 Andrada. Nagpuesto ti polis iti yan ti ridaw.
“Kas maibatay iti text message daydi Manong Mario ken ni Liza, nabtakan iti pilid ti dyip a naglugananyo iti bandana ti Barangay Camantirisan idi agalas dos kinse iti parbangon ti nadakamat a petsa. Ngem pinatalgedan ti maysa a saksi a taga-Camantirisan nga adda nangegna a banurbor ti limmabas a lugan iti batog ti balayda nga agturong iti ili manipud iti trenta agingga iti kuarenta y singko minutos sakbay ti alas tres.”

“Kayatmo kadi pay nga ituloyko, Andy?” sinaludsod ni Hepe de la Cuadra.

“Diak maawatan no ania ti turongen daytoy, ngem sige, ituloymo, Hepe,” insungbat ni Andy.

“Segun met laeng iti saksi a taga-Camantirisan, adda manen limmabas a lugan iti batogda a naggapu iti ili iti labes ti alas tres. Kas maibatay met iti palawag ti on-duty a guardia iti daydi a rabii, simmangpet ti bus iti 2:40 iti parbangon. Kinse minutos a nagur-uray ni Liza iti estasion ti Pardas sa simmangpet ti lakay ken baket a mangsukon kenkuana. Nangeg pay ti guardia a kinuna ti lakay ken ni Liza a nadadaelan ti luganda iti sungaban ti poblasion ket nagtraysikelda a nagpaestasion. Nupay kasta, idi pumanawda koman, adda nangsukon kadakuada a lalaki a naglugan iti dyip. Sika dayta a lalaki, Andy.”

Nagsardeng nga agsao ni Hepe de la Cuadra sana minatmatan iti nabayag ni Andy.

“Ibinsak kadi pay dagiti simmaruno a pasamak?” sinaludsodna.

“Agdengdengegak, Hepe,” kinuna ni Andy.

“Adda met gayam kunkuna ti spare tire nga insukatmo ket impes idi makadanonkayo iti Barangay Camantirisan. Dita ti nakalabsan kadakayo da Dante idi aggawiddan kalpasan nga insublida dagiti babbai nga inruarda iti beerhouse. Sinardengandakayo dagiti tallo. Bunga ti bartekda, nademonio ni Dante ket…. ammotayon dagiti simmaruno a nadagem a napasamak! Ti dakkel a saludsod: apay a nagulbodka, Andy? Gapu ta plinanom ti agibales, saan kadi?” kinuna ni Hepe de la Cuadra.

“Diak maawatan ti ibagbagam, Hepe,” kinuna ni Andy.

“Iti naminsan a pannakabartek ni Cito, sinurotmo agingga iti balayda ket pinalekmo ti ulona samo intapuak iti bubon.”

“Saan a pudno dayta, hepe!”

“Plinanom nga isaruno a patayen ni Mikong. Immayon kenka ti gundaway ta dinemdem ni Mikong ti pannakatay ni Cito ket nagpakni iti kalapawna iti tengnga ti kataltalonan. Salungayngay iti bartekna a nadatngam iti kalapaw ket dinuyokmo iti ice pick ti kilikilina samo imbitin iti sanga tapno suspetsaen dagiti inbestigador a kinettelna ti biagna.”
(Maigibusto)