Footer

Ryan Rice, naibunong kadagiti mannalon

CABUGAO, Ilocos Sur – Naiwaras dagiti bukel ti HR 182 wenno Ryan Rice kadagiti addaan ID card a mannalon ditoy nga ili idi Hunio 17 ken 18.

Mismo a ni Mayor Edgardo S. Cobangbang, Jr. ken dagiti konsehal ti ili a pakaibilangan da SBM Danny Q. Gazmen; Dr. Jemaima S. Tan-Yee; SBM Josefina S. Vallejo ken ni ABC President, Brgy. Captain Thaddeus “Teddy” U. Soller ti nangimatang iti pannakaiwaras iti nasao a bukel kadagiti addaan ID card a mannalon ditoy.

Nabingay iti dua nga aldaw ti pannakaiwaras dagiti bukel. Idi Hunio 17, immawat dagiti mannalon manipud iti sangapulo ket maysa a barangay a pakaibilangan ti Brgy. Bato, Nagsantaan, Cael-layan, Reppa-ac, Maradodon, Catucdaan, Sisim, Aragan, Nagsincaoan, Carusipan ken Cacadiran iti sag-dudua a pack ti Hybrid Rice 182 .

Iti maikadua nga aldaw, Hunio 18, dagiti addaan ID a mannalon manipud iti Brgy. Pug-os, Namruangan, Daclapan, Bungro, Salapasap, Salomague, Sabang, Dardarat, Marga-ay, Quezon ken Turod ti immawat met iti sag-dudua a pack ti nasao a bukel.

Umabot iti 4,600 dagiti mannalon nga addaan iti ID card ditoy nga ili.#

Comments are closed.