Footer

3 natiliw a nagbato iti kotse ti polis

BANTAY, Ilocos Sur – Nagpullo ti maysa a grupo a masuspetsa nga akinresponsible kadagiti insidente ti panagubor iti lugan iti pannakatiliw ti tallo nga agtutubo a nangbato iti kotse ti maysa a polis iti national highway a sakup daytoy nga ili idi parbangon ti Hulio 2.

Iti report manipud iti police station ditoy nga ili, nainaganan dagiti suspek a da Mark Khelvin Gampayon y Datu, 18, baro, estudiante, residente iti Brgy. Puspus, Bantay, Ilocos Sur; Jomar Palacpac y Bilag, 21, baro, security guard iti Department of Public Works and Highways; ken Jerick Saniatan y Ramos, 19, baro, agpada a residente iti Brgy. Bulala, Vigan City, Ilocos Sur.

Dagiti tallo nga agtutubo dagiti suspek a nangbato iti Toyota Vios a minaneho ni PO1 James Belvis Jr. y Tango, 33, naasawaan, PNP member a nakadestino iti Caoayan Municipal Police Station ken residente iti Brgy. 6, Vigan City, Ilocos Sur.
Kadua ni Belvis iti kotse dagiti padana a polis a pakaibilangan da PO1 Rodney Panela y Pamani, 28, naasawaan, nakadestino iti Caoayan MPS ken residente iti Brgy. Pantay Tamurong, Caoayan, Ilocos Sur ken PO1 Niño Lorenzo Pinzon y Vivero, 29, naasawaan, nakadestino iti Currimao MPS, Ilocos Norte ken residente of Brgy. Capangpangan, Vigan City, Ilocos Sur, idi napasamak ti insidente ti panagubor.

Naikras ti motorsiklo dagiti suspek bayat ti panaglibasda kadagiti kimmamat kadakuada a polis a puon ti nagsagrapanda kadagiti dunor iti nadumaduma a paset ti bagida.

Segun iti report, agdaldaliasat nga agpalaud a direksion iti kalsada nasional a sakup ti Zone 5 ti kotse a minaneho ni Belvis ket idi makadanon ti lugan iti asideg ti Petron Gasoline Station, mapapati a binato ida ti grupo ni Gampayon a puon ti nakabuongan ti sarming ti makannigid a paset ti lugan.

Naglibas dagiti suspek nga agpalaud iti Real Street ngem kinamat ida ni Belvis a nagtungpal iti pannakaikras dagiti nagbato.

Intaray dagiti nagresponde a polis-Bantay dagiti nadunor iti Metro Vigan Cooperative Hospital para iti pannakaagasda.

Iti kallabes, adda dagiti insidente ti panagubor kadagiti lugan ditoy nga ili nangruna iti rabii a nakalugan iti motorsiklo dagiti nagisayangkat.#

Comments are closed.