Footer

Babai, biktima iti kidnap for ransom gang?

VIGAN CITY – Gapu iti pangta iti biag ti anakna, naporsar nga inruar ti maysa a babai ti dakkel a kantidad manipud iti depositona iti bangko idi malem ti Hulio 8.

Nagpatulong iti polis ditoy ni Norma Ragon y Licuben, 37, naasawaan, natibo iti Bangued, Abra ngem aggigian iti Barangay Buquig, Bantay, Ilocos Sur tapno mapasublina ti P60,000.00 a kuartana a mapapati a pinaiwitdro dagiti di nabigbig a lalaki iti maysa a bangko kas kasukat ti biag ti anakna.

Kinuna ni Ragon a magmagnada nga agina iti Burgos Street, Barangay 1 iti abagatan ti Plaza Salcedo idi kellaat nga inlugan ida ti dua a di nabigbig a lalaki iti maysa a traysikel nga awanan iti plaka.

Mapapati nga imparking ti drayber ti traysikel iti Nueva Segovia Street, Barangay 1 ket ditoy nga imballaagda iti biktima a papatayenda ti anakna no saan a mangiruar iti P50,000.00 iti RCBC Bank.

Segun ken ni Ragon, pinaturongan pay ti lalaki iti paltog.

Saan a nailanad iti report no kasano nga ammo dagiti suspek nga adda deposito ti biktima iti nasao a bangko.

Napan ti biktima iti ATM booth ti RCBC ket nangiruar iti P50,000.00 sa nagsubli iti nakaparking a traysikel ken inyawatna ti nasao a kantidad.

Segun iti biktima, P60,000.00 amin ti kinurimes dagiti suspek agsipud ta nakairuaren iti P10,000.00 manipud met laeng iti ATM cardna sakbay ti pannakailuganda iti traysikel.

Naglibas dagiti suspek iti saan nga ammo a direksion.

Nangisayangkat ti polis-Vigan iti hot pursuit operation ngem saandan a nasapulan pay dagiti suspek.

Idi beneripikar dagiti polis iti bangko no makairuar ti biktima iti kasta kadakkel a kantidad, insungbat ti manedier nga agdagup laeng iti P50,000.00 ti maximum transaction iti ATM iti maysa nga aldaw.

Agtultuloy ti panagimbestiga dagiti otoridad tapno maammuan ti kinaasino dagiti nangbiktima ken ni Ragon.#

Comments are closed.