Footer

BANNER: Suspek iti pannakapapatay ti OFW, natuntonan dagiti polis iti Pidigan hospital

VIGAN CITY – Nupay nabigbigen ti suspek iti pannakapapatay ti maysa nga overseas Filipino worker iti sanguanan ti terminal ti maysa a bus transportation ditoy siudad idi agsapa ti Hulio 7, kitkitaen ti kapolisan ditoy ti anggulo a maysa a gun for hire ti nanggudas kenkuana.

Saanen a naidanon a sibibiag iti Metro Vigan Cooperative Hospital ni Ador Velasco y Rabang, 50, naasawaan, OFW, ken residente iti Balaleng Centro, Bantay, Ilocos Sur gapu iti patal a sugatna iti ulo.

Nainget met ti pannakabantayna iti Gabriela Silang General Hospital ni Albert Bloson Pacurza, 29, naasawaan, embutido vendor, ken residente iti Barangay Ba-ug, San Juan, Abra nga inaresto dagiti polis-Vigan iti Seares Memorial Hospital, Pidigan, Abra a nakaitarayanna.

Natuntonan dagiti polis ni Pacurza iti nadakamat nga ospital sadiay Pidigan, Abra babaen ti footage ti CCTV a naimuntar iti sanguanan ti ospital.

Nasugatan ni Pacurza idi pinakamatan ida iti putok ni Kevin Velasco y Almero, 21, baro, criminology student iti University of Northern Philippines bayat ti panaglibasda kalpasan ti panangpaltog ti suspek ken ni Velasco.

Kinuna ni Vigan City Chief of Police Supt. Jujith del Prado a nainget ti pannakabantay ti suspek tapno masigurado nga awan ti dakes a mapasamakna bayat ti kaaddana iti ospital.

Kinuna ni del Prado nga inkuyog dagiti polis-Vigan ni Kevin a nagturong iti Abra ket positibo a binigbig daytoy ti suspek a nangpaltog iti amana.

Iti panagimbestiga dagiti polis, kasangsangpet dagiti agama a naglugan iti nangisit a Hyundai Starex iti sanguanan ti terminal ti Partas Bus idi agarup 8:96 iti agsapa ti nadakamat a petsa ket bagbagkatenda dagiti kargamentoda idi inasitgan ti suspek ket pinaltoganna iti naminsan ti ulo ti biktima a nakatayanna a dagus.

Timmaray ti anak ti biktima iti kotse ket innalana ti cal. 45 sana pinaputokan ti suspek a sumakay koman iti nalabaga a motorsiklo a nagsagrapan daytoy iti sugat iti likudna, iti abagana ken pungupunguanna.

Natamaan met iti stray bullet ti akinlikud a windshield ken likud a bumper ti Toyota Corolla XL a minaneho ti agnagan Wella Mae Salvador bayat ti panangiparkingna ti luganna iti amianan a paset ti kalsada.

Nakarekobre ti SOCO team iti lima a cartridge case ti cal. 45 pistol iti nakapasamakan ti krimen.

Kitkitaen dagiti polis no adda naun-uneg a pannakainbolbar iti pammapatay ti maysa a Numeriano Realin Flores, ODU, ken residente iti Barangay Balaleng Laudenia ken Joel Palacpac Rodillas, residente iti Balaleng Centro, ta limtuad iti footages ti CCTV nga isuda ti nangitulod iti suspek iti Seares Memorial Hospital sadiay Pidigan, Abra, a naglugan iti maris dapo a Toyota Vios.

Nagsuspetsa dagiti polis-Abra agsipud ta awan met ti naireport a shooting incident iti lugar nga imbaga ti suspek a nakaalaanna kadagiti sugatna.

Mabirbirok ita da Numeriano Realin Flores ken Joel Palacpac Rodillas a mapapati a naglemmeng kalpasan a limtuad nga isuda ti nangitulod iti suspek iti nadakamat nga ospital idiay Abra.

Mapapati a kukua ti maysa a agnagan iti Clifford Palacpac, polis a nakadeploy iti Abra, ti kotse a naaramat a panangitulod iti suspek iti ospital.

Naireport a nakabakasion ti polis iti Metro Manila idi mapasamak ti pammapatay.

Ngem kinuna ni del Prado nga inimbitaranda ti polis tapno mapagsaludsodan mainaig iti kotsena a naaramat a panangitulod iti suspek iti ospital.

Iti pannakaisurat daytoy, saan pay a natuntonan dagiti polis ti motorsiklo a naaramat a getaway ti suspek ken di nabigbig a kaduana kalpasan ti pammapatay.#

Comments are closed.