Footer

Barangay kagawad, pinaltogan ti tanod

CABUGAO, Ilocos Sur – Saan a panagkinnaawatan bayat ti panagginomda ti ramut ti panangpaltog ti maysa a tanod iti kagawad iti Sitio Sagsagat, Barangay Cuantacla, ditoy nga ili idi rabii ti Hulio 6.

Segun iti police report, napasamak ti pammaltog iti balay ni Rodel Saribay y Duque, 29, naasawaan, ken kagawad bayat ti panaggiinomda kadagiti kalugaranna a pakairamanan ni Ronel Duque y Sunio, 24.

Mapapati nga adda di nagkinnaawatan da Saribay ken Duque ket inruar ti tanod ti paltogna sana pinaputokan ti kagawad ngem saanna a napuntaan. Nupay dinis-armaran dagiti kakadua ti biktima ti tanod, nabaelan daytoy ti naglibas.

Narekobre dagiti polis ti maysa a cal. 45 a nagmarka iti Colts MK IV/Series ‘70, government model, a nagkarga iti dua a bala ken maysa a kapsula iti nakapasamakan iti insidente.

Iti pannakaisurat daytoy, naiyumanen iti provincial prosecutor’s office ti kaso nga attempted homicide maikontra ken ni Duque.#