Footer

Daytoy a Dagaang

Sarita ni Jobert M. Pacnis
(Umuna a paset)
ITI report ti PAGASA, mapan manen a 39oC ti temperatura iti siudad ti Tuguegarao itoy nga aldaw. Ket isu latta ti kapudotan a disso iti pagilian. Saan san a ma-break dayta a record ti siudad.

Napangilangilak laengen. Dayta ti maysa a rason a diak unay kayat ti agpasiudad. Kadayta a temperatura ita, iti kinaagpaysuanan, di pay ket umaboten iti 40oC ti pudot a talaga a marikna?

Hmmm, namalbaliw a talagan ti panawen. Bumara a bumara ti lubong. Ania ngarud, matda ti tao a mangyadap iti bagina iti bunga met laeng dagiti aramidna.

No di la koma a nasisita ti rantaek idiay siudad, pakpakawan a mapanak. Ngem anian ta masapul ti putotko ti NSO birth certificate-na iti iseserrekna iti Grade 7. No apay ngamin, a, a di umanay ti masakada a birth certificate iti Local Civil Registrar!

Sipud nagturposak iti automotive idiay Cagayan State University, sangapulo ket dua a tawenen ti napalabas, mabilbilangen ditoy ramay ti panagpasiudadko. Aglalo ket adda metten bukod a pamilia sipud indatagko iti altar ni baket ta nasiiman dagiti nagannak kenkuana daydi panaglibasmi a nagpabaybay iti maysa a sardam. Limapulo metro ti kaadayo ti baybay iti amianan ti balayda.

Diak pay koma kayat idi ti mangasawa ta saanak pay a nakasapul iti natalged a panggedan. Ngem ania pay no kaslakami la naapput tarukoy iti abut. No tarayak ni baket idi, kamatennak la ketdi iti buli. Adda ‘detox’ a paltog ti amana— a siempre katugangak ita— idi (nalakonan iti kayongna a taga-Kalinga). Detox, kunami ‘tay paltik wenno wanpung a paltog. Tukkolem sa balaam manen iti maysa kalpasan a maiputokmo. Di kad’ di-tukkol. Detox, in short.

Ti napastrekmi (makais-isemak no malagipko ti kastoy ta kasla ketdin negosio ti panagkasar) ken ni baket iti kallaysami, disiotsomi la idi, ninayonan dagiti katugangak tapno makaipatakderak iti uray bassit la a shop-ko idiay ili. Siempre, saan met a nagpaudi ni tatang a maysa a mangngalap. Inad-adduanna bassit ti intulong dagiti katugangak.

Narigat ti makantiawan, kasta man ti nakitak a rason. Ngem pagyamanak ketdi ta ammodakami a tinulongan nga agassawa.

“Pangipaayanmi koma, aya, Dexter, barok, ti masapulanmi nga agassawa no di dakayo nga agkabsat ken kadagiti agbalin nga appomi,” kuna man idi ni tatang.

Nga uray la nakaluyaak.
Wen, a, ta diak pay nasubsubalitan ti panangpadakkel, panangpabasada kaniak ngem simrekakon iti biag a naestaduan. Pabasolek man dayta a selpon ta sipud naaddaanak iti unit a 3310, isun ti inaturgarko. Aglalo ket naalak ti CP number ti kursonadak a kabarangayak (ni baket dayta).

Ngem iti sabali a bangir, pagyamyamanak met ti pannakadiskobre ti selpon. Nalabit, saanak pay a nakanobia agingga ita a tallo dekadakon. Wen, ta adda nasakitko a tigerger. Diak maisawang ti ayatko iti sango ti babai a pagduyosak. Napaneknekak dayta idi agbasbasaak pay laeng idiay Tuguegarao (di pay idi a nagsiudad).

Kursonadak la unay daydi musa ti College of Technology. Babaen ti maysa a kailiak a gayyem ken kaklasena, nayasidegko ti bagik kenkuana. Ngem sanabagan, nupay naikkanak iti namin-adu a gundaway a mangipeksa iti riknak, anian ta kasla met nagalutan ti dilak no iruangankon nga ibaga. Namitlo pay a naawisko idi iti Ridge Cinema— a pagtagilakuan itan ti maysa a brand ti bado. Ngem pulos a diak naka-first base.

Sanabaganka, Dexter! kinunkunak iti bagik. Ibabainmo ti nagtaudam a pamilia. Agsusukot payen ti nobia dagiti kasinsinmo. Dika pay makamaysa!

Ibanag daydi a musa a pagraemak. Anak ti pito nga agkuerong a baka ta nakapaminsangapulokam’ sa pay a nag-batilpatong. Ngem talaga a tabbed ti dilak!

Sumagpaten nga alas sais idi makagtengak iti terminal dagiti van. Imparkingko ti motorsiklok iti pader a sikigan ti terminal. Pagsakayakto met daytoy inton makaawidak. Baka ket no masipngetanak a makaawid. Arkilaek no kuan ti luganko nga agpa-Ammubuan.

Apaman a nakaluganak, nagandaren. Kaskam la sardinas a napidipid iti uneg. Uppat a pasahero ti kada linia ti tugaw nupay nailet. Saan met nga isu ti dakkel a van. Iti akinlikud amin ti puestok, iti batog ti drayber.

“Ania metten nga iletna!” naireklamo. Nalasinko a maysa kadagiti babbai a nataengan metten a titser ti elementaria ti nagsao. “Pangtallo la koma met, a!”

“Nalawa dayta, madam…” insungbat ti drayber. “Agplastartay’ laeng koma a nasayaat, kakabsat.”

“Ania a nalawa? Nagilet la ngaruden! Tulademto met ita dagiti nalalawa a van iti panagkarkargam!”

“Intay’ ketdin,” kinuna ti dumna iti tawa iti makanawanko. Nagpudotto manen idiay Tuguegarao no maaldawantayo!”

Nagnan ti lugan. Ngem saan latta a nagsardeng ti maestra. “Luktam man ti erkonna, aya,” kinunana.

“Pasensian, madam, nadadael,” inkudkod ti drayber. “Patarimaankonto pay laeng ‘ton Sabado. Ilukatyo laengen dagiti tawa, kakabsat.”

“Tinakkabam koma ngarud, a, dayta nagdadakkelan nga AIRCONDITIONED dita sango!” naipugtit. “Pannakailawlaw-anen. ‘Diay la koma ngaruden sumaruno ti nagluganak.”

“Pasensiakayon, madam.”

“Overloading la ngaruden, awan pay gayam ti aircon-na. Anian!”

Namrayak laengen a binuya dagiti malabsanmi. Di pay la ngarud bumaba no sao a sao. Ngem sabagay, adda met ketdi rason ni ma’am. Nakaroda unay dagiti drayber no dadduma. Ipilitda ta kayatda a karga nupay nagilet nga agpayso dagiti luganda.

(Adda tuloyna)

Comments are closed.