Footer

Granada, nasarakan iti talon

CAOAYAN, Ilocos Sur – Maysa a granada ti nasarakan ti agama a mannalon iti talonda sadiay Barangay Caparacadan, ditoy nga ili idi bigat ti Hulio 8.

Segun iti report, nasarakan da Barangay Kagawad Teofilo Reotita ken ti anakna a ni Elmer ti granada bayat ti panangisaganada a maraepan ti talonda ket impakaammoda ken ni Barangay Captain Alex Reotita a nangipakaammo met iti police station.

Innala dagiti nagresponde nga ISPPSC Explosive and Ordnance Division (EOD) team ti granada.

Kabayatanna, maysa met a vintage bomb ti nakali dagiti trabahador iti barangay road a sakup ti Barangay Nalasin, Sto. Domingo idi met la bigat ti Hulio 9.

Agkalkali dagiti trabahador iti kalsada para iti iyinstolarda a tubo ti danum idi makalida ti nasao a bomba.

Naipaima met ti bomba iti EOD, ISPPO.#