Footer

La Union naideklara iti babaen ti state of calamity gapu iti Bagyo Egay

SAN FERNANDO CITY – Naideklara ti La Union iti babaen ti estado ti kalamidad gapu iti napigsa a tudo nga insangbay ni Bagyo Egay a nangisangbay iti pannakalayus dagiti kabalbalayan, pasdek negosio, ken kataltalonan iti probinsia.

Naideklara ti probinsia nga under state of calamity babaen ti rekomendasion ti Provincial Disaster Risk Reduction and Management Council (PDRRMC) gapu iti di nagsarday a panagbayakabakna a nangidateng iti nakaro a pannakalayus dagiti nadumaduma nga ili ti probinsia a pakaibilangan ti Aringay, Bacnotan, Balaoan, Bangar, Bauang, Caba, Luna, Naguilian, Rosario, San Gabriel, San Juan, Santol ken Sto. Tomas, ken daytoy a siudad.

Kanaig daytoy, imbilin ni Gov. Manuel Ortega ti pannakasuspenso ti trabaho kasta met iti klase kadagiti apektado a lugar tapno maiyadayo dagiti agnaed iti pannakaisagmak.

Segun iti PDRRMC, iti kadagupan a 20 nga ili, 14 ti naapektaran iti nakaro a tudo idinto a nasurok a 12,880 a pamilia wenno 52,665 a tattao ti napadisi kadagiti pagtaenganda.

Inreport pay ti PDRRMC nga agdagup iti 135 a balay ti narpuog idinto a 16 ti total a nadadael.

Nagsagrap iti nakaro a pannakalayus amin dagiti barangay iti Bacnotan ket idi alas nuebe ti bigat ti Domingo, pagat-barukongen ti danum.

Kabayatanna, idi Domingo, saan a mabalin a madalanan dagiti lugan ti San Juan-San Gabriel Road, Bauang-San Fernando Manila North Road (MNR), Ili, Norte San Juan, Poblacion, Bacnotan, Brgy. Rising, Luna ken ti MNR- Parian, San Fernando City.

Nupay kasta, makalasat met laengen dagiti bus ken dadduma pay a behikulo kadagitoy a kalsada idi Lunes.#

Comments are closed.