Footer

EDITORIAL: Kasapulanen ti pannakamonitor dagiti backyard industries

Nakaam-amak ita dagiti mairepreport a pannakaiyospital dagiti umili, nangruna dagiti estudiante gapu iti pannakasabidongda iti impaunegda a taraon a ginatangda.

Idi Hulio 10, naireport dagiti kaso ti food poisoning iti Caraga region a pakaibilangan ti Surigao del Sur, Surigao del Norte ken Agusan del Sur a nakaiyospitalan ti nakurang a 2,000 a tattao.

Maitudtudo a nasabidongan dagiti biktima babaen ti kinnanda a durian ken mangosteen candies iti babaen ti nagan a “Wendy’s”, produkto a naggapu iti Davao City.

Sakbay a naitarayda iti ospital, nagsakit ti tian dagiti biktima, nakariknada iti sakit ti ulo, pannakaulaw, gurigor, panagbakuar idinto a dagiti dadduma, limmablabbaga ti matada.

Sabali a pannakasabidong dagiti estudiante ken mangisursuro ti naireport sadiay Sultan Kudarat idi Hulio 14.

Agdagup iti sangapulo ket uppat nga estudiante ken maysa a mangisursuro iti Sultan Kudarat State University Lutaya campus ti naitaray iti South Cotabato Provincial Hospital kalpasan a nanganda iti pastil, maysa a Muslim delicacy a kumbinasion ti innapuy ken karne ti manok a nabungon iti bulong ti saba.

Naireport a ginatang dagiti biktima ti nasao a taraon iti maysa nga estudiante ket daytoy ti nagbalin nga snackda.

Simmaruno a naireport ti pannakasabidong ti limapulo ket pito nga agbasbasa iti Alay Elementary School kalpasan a nanganda iti squash patty wenno kalabasang okoy a ginatangda iti ruar ti pagadalan.

Uppat a pulo met nga estudiante iti Sumulong High School iti Cubao ti naiyospital gapu iti pannakaulaw ken panagbakuarda kalpasan ti pannanganda iti macapuno candy.

Segun iti report, naggapu ti candy manipud iti Calauan, Laguna manipud iti tallo a lallaki a nakiragup kadagiti estudiante.

Kas ninamnama, inkalintegan ti agparpartuat iti Wendy’s nga awan ti pannakaibiangda iti pannakailako dagiti partuatda a kendi iti Caraga region ket mabalin nga in-repack dagiti vendors sada inlako dagiti produktoda ken mabalin a nagpason dagiti inlakoda a produktoda.
Kinuna ti Department of Health a kas maibatay iti resulta ti panangamirisna, maysa a bakteria a masarakan iti kudil ti tao ken buok ti nangkontaminar kadagiti kendi.

Saan a nabugguan ti ima dagiti agar-aramid iti kendi, wenno natedtedan iti ling-etda dagiti kendi, wenno inaprosanda dagiti kilikilida wenno saanda a nagugas kalpasan a naggapuda iti CR wenno bathroom.

Maymaysa ti kayat a sawen daytoy: saan a nainget ti gobierno, nangruna ti Food and Drug Administration ken ti DoH iti panangipakatda kadagiti paglintegan tapno masiguro a nasalun-at dagiti maaramid a kendi wenno sinam-it ken dadduma pay a makan a mailako kadagiti tattao nangruna kadagiti estudiante.

Saan a mailibak nga adu a backyard industries ti saan a naglasat iti Food and Drug Administration.

Kasapulanen ti naing-inget a pannakamonitor dagiti babassit a negosio nga agar-aramid kadagiti kendi ken sinam-it iti panangisagada kadagiti produktoda kas maiyataday iti pagbatayan ti FDA tapno saanen a maulit dagitoy a pannakasabidong dagiti tattao iti gatangenda a tagilako dagitoy babassitan a negosio.#